റജബ് 26/1447
ജനുവരി 16/2025
ലക്കം: 245
ഉള്ളടക്കം
▪️മുഖലിഖിതം
അക്രമിയുടെ കൈ പിടിക്കുക.
✍️ മൗലാനാ സയ്യിദ് അബുൽ ഹസൻ അലി ഹസനി നദ്വി
▪️ജുമുഅ സന്ദേശം
മിഅ്റാജ് യാത്ര
✍️ മൗലാനാ ഡോ. മുഹമ്മദ് സഊദ് ആലം ഖാസിമി
▪️മആരിഫുല് ഖുര്ആന്
സൂറത്തുൽ മുൽക്
പടച്ചവന്റെ മഹത്വം, നിഷേധത്തിന്റെ അന്ത്യം, ഭയഭക്തരുടെ വിജയം, പടച്ചവന്റെ വിശാലമായ അറിവും കഴിവും വിളിച്ചറിയിക്കുന്ന ദൃഷ്ടാന്തങ്ങൾ, അശ്രദ്ധർക്ക് മുന്നറിയിപ്പ്.
✍️ മൗലാനാ മുഫ്തി മുഹമ്മദ് ശഫീഅ് ഉസ്മാനി
▪️കവർ സ്റ്റോറി
ബഹുമാന്യ ഇമാമുമാരോട്....
✍️ മൗലാനാ സയ്യിദ് ബിലാൽ ഹസനി നദ്വി
ഇസ്ലാമോഫോബിയ : പരിഹാര മാർഗ്ഗങ്ങൾ
✍️ സയ്യിദ് സആദത്തുല്ലാഹ് ഹുസൈനി
▪️മആരിഫുല് ഹദീസ്
ഉസ്മാൻ ദുന്നൂറൈൻ (റ)ൻ്റെ മഹത്വങ്ങൾ.
✍️ മൗലാനാ മുഹമ്മദ് മന്സൂര് നുഅ്മാനി
▪️ഗ്രന്ഥ പരിചയം
ഈമാനും നമസ്കാരവും പരസ്പര കടമകളും
🔹🔹🔹🔹🔹🔹🔹
മുഖലിഖിതം
അക്രമിയുടെ കൈ പിടിക്കുക.
അക്രമത്തെ എതിർക്കുന്ന വിഷയത്തിൽ മതവും സമുദായവും ജാതിയും വിഭാഗവും ബന്ധങ്ങളെയും താൽപര്യങ്ങളെയും പരിപൂർണ്ണമായി നാം അവഗണിക്കണം. അക്രമി ആരാണ്? അക്രമിക്കപ്പെട്ടവൻ ഏതാണ്? എന്ന് ഒരിക്കലും നോക്കരുത്. അക്രമി തന്റെ സമൂഹത്തിലെ പ്രിയങ്കര വ്യക്തിത്വമോ നേതാവോ നായകനോ ആരുമായിക്കൊള്ളട്ടെ, അയാളെ അക്രമത്തിൽ നിന്നും തടഞ്ഞു നിർത്താൻ നാം തയ്യാറാകണം. ഒരു സമൂഹത്തിൽ ഇത്തരം സ്വഭാവപരമായ ധൈര്യവും നിഷ്പക്ഷതയും നിഷ്കളങ്കതയും ഉദ്ദേശശുദ്ധിയും ഉണ്ടായിത്തീർന്നാൽ ആ സമൂഹം രക്ഷപ്പെടും. ഇവയില്ലായെങ്കിൽ മറ്റെന്തുണ്ടായാലും ആ സമൂഹം രക്ഷപ്പെടുന്നതല്ല. ഖേദകരമെന്ന് പറയട്ടെ, ഇന്ന് ഇന്ത്യ യിൽ ഈ മഹൽ ഗുണത്തിന്റെ കുറവ് കാണപ്പെടുന്നു. അത് കൊണ്ട് തന്നെ ഇന്ത്യൻ സമൂഹത്തെക്കുറിച്ച് വലിയ ഭയാശങ്കകൾ ഉടലെടുത്തിരിക്കുകയാണ്.
ഏതെങ്കിലും സമൂഹത്തിലോ സമയത്തോ സ്ഥലത്തോ മനുഷ്യൻ ഇത്തരം പൈശാചികമായ ഗൂഢാലോചനയ്ക്ക് ഇരയായി സ്വഭാവമൂല്യങ്ങൾക്ക് തകർച്ച സംഭവിക്കുമ്പോൾ, അതിനെ തിരുത്താൻ രണ്ട് വിഭാഗങ്ങൾ രംഗത്തെത്താറുണ്ട്. ഒന്ന്, വിദ്യാസമ്പന്നർ. രണ്ട്, മതബോധമുള്ളവർ, ഈ രണ്ട് വിഭാഗങ്ങളിൽ നാശം അവസാനം മാത്രമേ പ്രവേശിക്കുകയുള്ളൂ. സംശുദ്ധ ബുദ്ധിയുടെ വിധിയും ഇത് തന്നെയാണ്. എന്നാൽ വിദ്യാസമ്പന്നരിലും മത ബോധമുള്ളവരിലും നാശം കയറിക്കൂടിക്കഴിഞ്ഞാൽ പിന്നെ ആ സമൂഹത്തിന്റെ തകർച്ച തീർച്ചയാണ്.
അത് കൊണ്ട് വിദ്യാഭ്യാസവും മതബോധവുമുള്ളവരും രംഗത്തിറങ്ങേണ്ട ഒരു സന്ദർഭമാണിത്. വിദ്യാലയങ്ങളിൽ നിന്നും പുറത്തിറങ്ങി സമൂഹത്തെ രക്ഷിക്കാനുള്ളബാധ്യത നാം നിർവ്വഹിക്കേണ്ടിയിരിക്കുന്നു. ഞാനും നിങ്ങളും ജീവിച്ചിരിക്കുന്ന കാലഘട്ടത്തെക്കുറിച്ച് അടുത്ത കാലത്തെ ചരിത്രകാരൻ എഴുതുമ്പോൾ ഇപ്രകാരം രേഖപ്പെടുത്തുമോ എന്ന് എനിക്ക് ഭയമുണ്ട്; “അലീഗഡ് മുസ്ലിം യൂണിവേഴ്സിറ്റിയും ദേവബന്ദ് ദാറുൽ ഉലൂമും ലഖ്നൗ നദ് വതുൽ ഉലമയും ദൽഹി ജാമിഅ മില്ലിയ്യയും ഉണ്ടായിരുന്നപ്പോഴാണ്, എന്നല്ല. അതിന്റെ ഭിത്തിയുടെ കീഴിലാണ് ഈ ദുരന്തങ്ങൾ അരങ്ങേറിയത്. ഈ വരികൾ വായിക്കുമ്പോൾ അടുത്ത തലമുറ നമ്മെ വിലയിരുത്തുന്നതെങ്ങിനെയായിരിക്കും. അതുകൊണ്ട് നാം കർമ്മരംഗത്തിറങ്ങുക. നാശകരമായ പ്രവർത്തനങ്ങളും നിയമരാഹിത്യവും ചതിയും വഞ്ചനയും കൈക്കൂലിയും പൂഴ്ത്തിവെയ്പും പക്ഷപാതിത്വവും ഹൃദയകാഠിന്യതയും എല്ലാത്തിനും ഉപരിയായി മൃഗീയതയും രക്തചൊരിച്ചിലും രാജ്യത്തെ ആകമാനം അപകടത്തിലേക്ക് തള്ളിവിടുകയാണ്. അതിനെ തടഞ്ഞ് തോൽപ്പിക്കാൻ നാം സന്നദ്ധരാകുക.
മൗലാനാ സയ്യിദ് അബുൽ ഹസൻ അലി ഹസനി നദ്വി
(മുൻ ചെയർമാൻ, ആൾ ഇന്ത്യാ മുസ്ലിം പേഴ്സണൽ ലോ ബോർഡ്)
🔹🔹🔹🔹🔹🔹🔹
ALL INDIA MUSLIM PERSONAL LAW BOARD
ജുമുഅ സന്ദേശം
മിഅ്റാജ് യാത്ര
✍️ മൗലാനാ ഡോ. മുഹമ്മദ് സഊദ് ആലം ഖാസിമി
(എക്സിക്യൂട്ടീവ് മെമ്പർ, ആൾ ഇന്ത്യാ മുസ്ലിം പേഴ്സണൽ ലോ ബോർഡ്)സർവ്വസ്തുതിയും ലോകരക്ഷിതാവായ അല്ലാഹുവിനാണ്. ആദരവായ റസൂലുല്ലാഹി ﷺയുടെ മേൽ അല്ലാഹുവിന്റെ സ്വലാത്തും സലാം ഉണ്ടാവട്ടെ!
അല്ലാഹു പരിശുദ്ധ ഖുർആനിൽ പറയുന്നു:
"തൻ്റെ അടിമയെ മസ്ജിദുൽ ഹറാമിൽ നിന്ന് പരിസരം നാം അനുഗ്രഹീതമാക്കിയിരിക്കുന്ന മസ്ജിദുൽ അഖ്സയിലേക്ക് രാവിൻ്റെ ഒരംശത്തിൽ യാത്ര ചെയ്യിച്ചവൻ എത്ര പരിശുദ്ധൻ! നമ്മുടെ ദൃഷ്ടാന്തങ്ങളിൽ ചിലത് അദ്ദേഹത്തിന് കാണിച്ചുകൊടുക്കാൻ വേണ്ടിയത്രെ അത്. തീർച്ചയായും അല്ലാഹു എല്ലാം കേൾക്കുന്നവനും കാണുന്നവനുമാകുന്നു." (സൂറത്തുൽ ഇസ്റാഅ്: 1)
റസൂലുല്ലാഹി ﷺയുടെ പ്രവാചക ജീവിതത്തിലെ സവിശേഷവും പ്രധാനപ്പെട്ടതുമായ സംഭവമാണ് മിഅ്റാജ് യാത്ര. പ്രബലമായ റിപ്പോർട്ടുകൾ പ്രകാരം റജബ് 27-ാം രാവിലാണ് ഇത് സംഭവിച്ചത്. അന്ന് റസൂലുല്ലാഹി ﷺക്ക് 50 വയസ്സിലധികം പ്രായമുണ്ടായിരുന്നു. മസ്ജിദുൽ ഹറാമിൽ നിന്ന് മസ്ജിദുൽ അഖ്സയിലേക്കുള്ള യാത്രയെ 'ഇസ്രാഅ്' എന്നും, മസ്ജിദുൽ അഖ്സയിൽ നിന്ന് സിദ്റത്തുൽ മുൻതഹയിലേക്കുള്ള യാത്രയെ 'മിഅ്റാജ്' എന്നും വിളിക്കുന്നു. ഈ മുഴുവൻ യാത്രയെയും ‘ഇസ്രാഅ്-മിഅ്റാജ്' എന്നും പറയാറുണ്ട്.
ഖുർആനിൽ മിഅ്റാജ് യാത്രയെക്കുറിച്ച് ചുരുക്കരൂപത്തിലാണ് പരാമർശിച്ചിട്ടുള്ളത്. എന്നാൽ ഹദീസുകളിലും സീറ ഗ്രന്ഥങ്ങളിലും ഇതിൻ്റെ വിശദാംശങ്ങളുണ്ട്. ഇരുപതിലധികം സ്വഹാബികൾ മിഅ്റാജ് യാത്രയെക്കുറിച്ച് റിപ്പോർട്ട് ചെയ്തിട്ടുണ്ട്. ഇതിൻ്റെ ചുരുക്കം ഇതാണ്: ഒരു രാത്രി നബി(സ) ഉമ്മുഹാനി (റ)യുടെ വീട്ടിൽ ഇശാ നിസ്കരിച്ച് ഉറങ്ങുകയായിരുന്നു. ജിബ്രീൽ(അ) വന്ന് റസൂലുല്ലാഹി ﷺയെ ഉണർത്തി മസ്ജിദുൽ ഹറാമിലേക്ക് കൊണ്ടുപോയി. അവിടെ വെളുത്ത നിറമുള്ള 'ബുറാഖ്' എന്ന വാഹനമുണ്ടായിരുന്നു. കുതിരയ്ക്കും കോവർകഴുതയ്ക്കും ഇടയിലായിരുന്നു അതിൻ്റെ വലിപ്പം. റസൂലുല്ലാഹി ﷺയെ അതിൽ കയറ്റി. ബുറാഖ് മിന്നൽ വേഗത്തിൽ മസ്ജിദുൽ അഖ്സയിൽ എത്തിച്ചേർന്നു. ജിബ്രീലും മീക്കാഈലും റസൂലുല്ലാഹി ﷺയോടൊപ്പം ഉണ്ടായിരുന്നു.
മസ്ജിദുൽ അഖ്സയിൽ എത്തിയ ശേഷം റസൂലുല്ലാഹി ﷺ ബുറാഖിനെ ഒരു കല്ലിൽ ബന്ധിച്ചു. ശേഷം പള്ളിയിൽ പ്രവേശിച്ച് രണ്ട് റക്അത്ത് നിസ്കരിച്ചു. മസ്ജിദുൽ അഖ്സയിൽ ഇബ്രാഹിം (അ), മൂസാ (അ), ഈസാ (അ) തുടങ്ങിയ പ്രവാചകന്മാർ ഉണ്ടായിരുന്നു. റസൂലുല്ലാഹി ﷺ അവർക്ക് ഇമാമായി നിസ്കരിച്ചു. ജിബ്രീൽ (അ) പറഞ്ഞു: "നിയോഗിക്കപ്പെട്ട എല്ലാ പ്രവാചകന്മാരും അങ്ങയുടെ പിന്നിൽ നിസ്കരിച്ചു." മസ്ജിദുൽ അഖ്സയിൽ വെച്ച് റസൂലുല്ലാഹി ﷺക്ക് സൽക്കാരത്തിനായി രണ്ട് പാത്രങ്ങൾ നൽകപ്പെട്ടു. ഒന്നിൽ പാലും മറ്റൊന്നിൽ മദ്യവുമായിരുന്നു. റസൂലുല്ലാഹി ﷺ പാൽ കുടിക്കുകയും മദ്യം ഒഴിവാക്കുകയും ചെയ്തു. ജിബ്രീൽ(അ) പറഞ്ഞു: "അല്ലാഹു അങ്ങയെ പ്രകൃതിപരമായ മാർഗ്ഗത്തിലൂടെ നയിച്ചു. അങ്ങ് മദ്യമാണ് കുടിച്ചിരുന്നതെങ്കിൽ അങ്ങയുടെ സമുദായം വഴിപിഴച്ചു പോകുമായിരുന്നു."
മസ്ജിദുൽ അഖ്സയിൽ നിന്ന് മലക്കുകളുടെ അകമ്പടിയോടെ റസൂലുല്ലാഹി ﷺ ആകാശത്തേക്ക് യാത്രയായി. അല്ലാഹുവിന്റെ അടുപ്പക്കാരായ മലക്കുകൾ റസൂലുല്ലാഹി ﷺ സ്വീകരിച്ചു. ഒന്നാം ആകാശത്ത് എത്തിയപ്പോൾ ആദം (അ)നെ കണ്ടുമുട്ടി. റസൂലുല്ലാഹി ﷺ അദ്ദേഹത്തിന് സലാം പറഞ്ഞു, അദ്ദേഹം മറുപടി നൽകുകയും പ്രാർത്ഥിക്കുകയും ചെയ്തു. ആദം (അ)ന്റെ വലതുഭാഗത്തും ഇടതുഭാഗത്തും ചില രൂപങ്ങൾ ഉണ്ടായിരുന്നു. വലത്തോട്ട് നോക്കുമ്പോൾ അദ്ദേഹം ചിരിക്കുകയും ഇടത്തോട്ട് നോക്കുമ്പോൾ കരയുകയും ചെയ്തിരുന്നു. വലതുഭാഗത്തുള്ളവർ സ്വർഗ്ഗാവകാശികളായ നല്ല മക്കളാണെന്നും ഇടതുഭാഗത്തുള്ളവർ നരകാവകാശികളായ മോശം മക്കളാണെന്നും ജിബ്രീൽ (അ) പറഞ്ഞു കൊടുത്തു.
രണ്ടാം ആകാശത്ത് റസൂലുല്ലാഹി ﷺ, യഹ്യ (അ), ഈസാ (അ) എന്നിവരെ കണ്ടുമുട്ടി. മൂന്നാം ആകാശത്ത് യൂസുഫ് (അ)നെയും, നാലാം ആകാശത്ത് ഇദരീസ് (അ)നെയും കണ്ടുമുട്ടി. അഞ്ചാം ആകാശത്ത് ഹാറൂൻ (അ)നെയും, ആറാം ആകാശത്ത് മൂസാ (അ)നെയും കണ്ടുമുട്ടി. ഏഴാം ആകാശത്ത് ഇബ്റാഹീം (അ)നെയും കണ്ടു. എല്ലാവരുമായും സലാം പറയുകയും എല്ലാവരും സ്വാഗതം ചെയ്യുകയും ചെയ്തു.
പിന്നീട് ജിബ്രീൽ(അ) റസൂലുല്ലാഹി ﷺ സിദ്റത്തുൽ മുൻതഹയിലേക്ക് കൊണ്ടുപോയി. അവിടെ വെച്ച് റസൂലുല്ലാഹി ﷺ ജിബ്രീലിനെ അദ്ദേഹത്തിൻ്റെ യഥാർത്ഥ രൂപത്തിൽ കണ്ടു. അദ്ദേഹത്തിന് 600 ചിറകുകൾ ഉണ്ടായിരുന്നു. അവിടെ വെച്ച് സ്വർഗ്ഗവും നരകവും കണ്ടു. അല്ലാഹു തൻ്റെ സൃഷ്ടിപ്പിലെ അത്ഭുതങ്ങളും വലിയ ദൃഷ്ടാന്തങ്ങളും റസൂലുല്ലാഹി ﷺക്ക് കാണിച്ചുകൊടുത്തു. വിശുദ്ധ ഖുർആനിലെ സൂറത്ത് അന്നജ്മിൽ ഇതിനെക്കുറിച്ച് ഇപ്രകാരം പറയുന്നു:
"ശക്തിയേറിയവനാണ് അദ്ദേഹത്തെ പഠിപ്പിച്ചത്. കരുത്തുള്ളവൻ. അങ്ങനെ അവൻ (ചക്രവാളത്തിൽ) നേരെ നിന്നു. അവൻ അത്യുന്നതമായ മണ്ഡലത്തിലായിരുന്നു. പിന്നെ അവൻ അടുത്തു; അങ്ങനെ അവൻ (കൂടുതൽ) അടുത്തു. അങ്ങനെ അവൻ രണ്ട് വില്ലുകളുടെ അകലത്തിലോ അതിനേക്കാൾ അടുത്തോ ആയി. അപ്പോൾ അവൻ തൻ്റെ അടിമയ്ക്ക് അവൻ നൽകിയ സന്ദേശം നൽകി. കണ്ട കാര്യത്തിൽ ഹൃദയം കള്ളം പറഞ്ഞിട്ടില്ല. എന്നിരിക്കെ അദ്ദേഹം കാണുന്ന കാര്യത്തെപ്പറ്റി നിങ്ങളദ്ദേഹത്തോടു തർക്കിക്കുകയാണോ? മറ്റൊരു ഇറക്കത്തിലും അദ്ദേഹത്തെ (ജിബ്രീലിനെ) അദ്ദേഹം കണ്ടിട്ടുണ്ട്. സിദ്റത്തുൽ മുൻതഹയുടെ അടുത്ത് വെച്ച്. അതിൻ്റെ അടുത്താണ് ജന്നത്തുൽ മഅ്വാ (വാസസ്ഥലമായ സ്വർഗ്ഗം). സിദ്റത്തിനെ മൂടിയതൊക്കെ അതിനെ മൂടിയപ്പോൾ. (നബിയുടെ) ദൃഷ്ടി തെറ്റിപ്പോയിട്ടില്ല; അത് അതിരുകവിഞ്ഞിട്ടുമില്ല. തീർച്ചയായും തൻ്റെ രക്ഷിതാവിൻ്റെ വലിയ ദൃഷ്ടാന്തങ്ങളിൽ ചിലത് അദ്ദേഹം കാണുകയുണ്ടായി." (അന്നജ്മ് 5-18)
അല്ലാഹു റസൂലുല്ലാഹി ﷺയെ മിഅ്റാജ് യാത്രയ്ക്ക് വിളിച്ചുവരുത്തി കാണിച്ചുകൊടുത്ത ആ വലിയ ദൃഷ്ടാന്തങ്ങൾ എന്തൊക്കെയാണ്? ഹദീസുകളിലും തഫ്സീറുകളിലും ഇതിൻ്റെ വിശദാംശങ്ങൾ വന്നിട്ടുണ്ട്.
സിദ്റത്തുൽ മുൻതഹയിൽ നിന്ന് റസൂലുല്ലാഹി ﷺ അല്ലാഹുവിൻ്റെ സന്നിധിയിലെത്തി. അല്ലാഹുവിൻ്റെ സൗന്ദര്യത്തിന്റെ മറകൾക്കപ്പുറം ദർശിച്ചു. അല്ലാഹു റസൂലുല്ലാഹി ﷺയോട് സംസാരിക്കുകയും 50 നേരത്തെ നിസ്കാരം സമ്മാനമായി നൽകുകയും ചെയ്തു. ഇത് ഈ സമുദായത്തിന് മിഅ്റാജിന് തുല്യമായ സമ്മാനമായിരുന്നു.
അല്ലാഹുവുമായുള്ള സംഭാഷണത്തിനും സ്വകാര്യ സംഭാഷണങ്ങൾക്കും ശേഷം നിസ്കാരമെന്ന സമ്മാനവുമായി മടങ്ങുമ്പോൾ മൂസാ (അ)നെ കണ്ടുമുട്ടി. "എന്താണ് കൽപ്പിക്കപ്പെട്ടത്?" എന്ന് അദ്ദേഹം ചോദിച്ചു. "50 നേരത്തെ നിസ്കാരം," എന്ന് റസൂലുല്ലാഹി ﷺ മറുപടി നൽകി. മൂസാ (അ) പറഞ്ഞു: "ബനീ ഇസ്രായീലിലെ അനുഭവം എൻ്റെ മുന്നിലുണ്ട്. അങ്ങയുടെ സമുദായത്തിന് 50 നേരത്തെ നിസ്കാരം താങ്ങാനാവില്ല. അതിനാൽ അല്ലാഹുവിനോട് ഇളവ് ചോദിക്കൂ."
റസൂലുല്ലാഹി ﷺ തിരിച്ചുപോയി നിസ്കാരങ്ങളുടെ എണ്ണത്തിൽ ഇളവിനായി അപേക്ഷിച്ചു. അല്ലാഹു അഞ്ച് എണ്ണം കുറച്ചു നൽകി. വീണ്ടും മൂസാ (അ)നെ കണ്ടപ്പോൾ വീണ്ടും കുറയ്ക്കാൻ ആവശ്യപ്പെടാൻ പറഞ്ഞു. അങ്ങനെ പലതവണ അല്ലാഹുവിൻ്റെ സന്നിധിയിൽ പോയിവന്നതിലൂടെ അവസാനം 45 എണ്ണം കുറയ്ക്കുകയും 5 നേരത്തെ നിസ്കാരം ബാക്കിയാവുകയും ചെയ്തു. ഈ അഞ്ച് നേരത്തെ നിസ്കാരത്തിന് അമ്പത് നേരത്തെ നിസ്കാരത്തിൻ്റെ പ്രതിഫലവും പുണ്യവും നിശ്ചയിക്കപ്പെട്ടു! അല്ലാഹുവിൻ്റെ സന്നിധിയിൽ നിന്ന് നിസ്കാരമെന്ന സമ്മാനവുമായി റസൂലുല്ലാഹി ﷺ മസ്ജിദുൽ അഖ്സയിൽ തിരിച്ചെത്തി. അവിടെ നിന്ന് ബുറാഖിൽ കയറി പ്രഭാതത്തിന് മുമ്പ് തന്നെ മക്കയിൽ തിരിച്ചെത്തി.
മിഅ്റാജ് യാത്രയിൽ ജിബ്രീൽ (അ) റസൂലുല്ലാഹി ﷺക്ക് ചില അദൃശ്യ കാര്യങ്ങൾ കൂടി കാണിച്ചുകൊടുത്തു. മനുഷ്യരുടെ മോശം പ്രവർത്തികൾക്ക് പരലോകത്ത് ലഭിക്കുന്ന ശിക്ഷകൾ ഉദാഹരണങ്ങളിലൂടെ കാണിക്കുകയായിരുന്നു.
* ചെമ്പ് കൊണ്ടുള്ള നഖങ്ങൾ കൊണ്ട് സ്വന്തം മുഖവും നെഞ്ചും മാന്തിപ്പൊളിക്കുന്ന ഒരു കൂട്ടരെ കണ്ടു. "ഇവർ ആരാണ്?" എന്ന് റസൂലുല്ലാഹി ﷺ ചോദിച്ചപ്പോൾ, "ഇവർ പരദൂഷണം പറയുന്നവരാണ്" എന്ന് ജിബ്രീൽ(അ) പറഞ്ഞു.
* കല്ലുകൊണ്ട് തല തകർക്കപ്പെടുന്ന ഒരു കൂട്ടരെ കണ്ടു. തകർക്കപ്പെട്ട ശേഷം തല പഴയതുപോലെയാവുകയും വീണ്ടും തകർക്കപ്പെടുകയും ചെയ്യുന്നു. "ഇവർ ആരാണ്?" എന്ന് ചോദിച്ചപ്പോൾ, "ഇവർ നിർബന്ധ നിസ്കാരം ഉപേക്ഷിക്കുന്നവരാണെന്ന്" ജിബ്രീൽ(അ) പറഞ്ഞു.
* മറ്റൊരു കൂട്ടരുടെ അരികിലൂടെ റസൂലുല്ലാഹി ﷺ കടന്നുപോയി. അവർ നാണം മറയ്ക്കാൻ തുണിക്കഷ്ണങ്ങൾ മാത്രം ധരിച്ച്, മൃഗങ്ങളെപ്പോലെ മുള്ളുകൾ തിന്നുകയായിരുന്നു. "ഇവർ ആരാണ്?" എന്ന് ചോദിച്ചപ്പോൾ, "ഇവർ തങ്ങളുടെ സമ്പത്തിന്റെ സക്കാത്ത് നൽകാത്തവരാണെന്ന്" ജിബ്രീൽ (അ) പറഞ്ഞു.
* നല്ല വേവിച്ച മാംസം മുന്നിലുണ്ടായിട്ടും അത് ഉപേക്ഷിച്ച് ചീഞ്ഞ മാംസം തിന്നുന്നവരെ കണ്ടു. റസൂലുല്ലാഹി ﷺ ചോദിച്ചപ്പോൾ ജിബ്രീൽ (അ) പറഞ്ഞു: "സ്വന്തം ഭാര്യമാരുണ്ടായിട്ടും അന്യസ്ത്രീകളുമായി രാത്രി കഴിച്ചുകൂട്ടുന്ന അങ്ങയുടെ സമുദായത്തിൽ പെട്ടവരാണിവർ."
* കത്രിക കൊണ്ട് നാവും ചുണ്ടും മുറിക്കപ്പെടുന്നവരെ കണ്ടു. "ഇവർ ആരാണ്?" എന്ന് ചോദിച്ചപ്പോൾ ജിബ്രീൽ (അ) പറഞ്ഞു: "മറ്റുള്ളവരെ ഉപദേശിക്കുകയും എന്നാൽ സ്വന്തം ജീവിതത്തിൽ അത് പകർത്താതിരിക്കുകയും ചെയ്യുന്ന അങ്ങയുടെ സമുദായത്തിലെ പ്രസംഗകരാണിവർ."
* ദാഹിച്ച ഒട്ടകത്തെപ്പോലെ വലിയ വയറുള്ളവരെ വയറുമായി നരകത്തിലേക്ക് തള്ളപ്പെടുന്നവരെ കണ്ടു. "ഇവർ ആരാണ്?" എന്ന് ചോദിച്ചപ്പോൾ, "ഇവർ പലിശ തിന്നുന്നവരാണെന്ന്" ജിബ്രീൽ(അ) പറഞ്ഞു.
മിഅ്റാജ് കഴിഞ്ഞ് രാവിലെ തൻ്റെ യാത്രയെക്കുറിച്ച് റസൂലുല്ലാഹി ﷺ ജനങ്ങളോട് പറഞ്ഞപ്പോൾ, അത് അസാധ്യമാണെന്ന് കരുതി ദുർബല വിശ്വാസികളായ ചിലർ മതം ഉപേക്ഷിച്ചു. മക്കയിലെ നിഷേധികൾ റസൂലുല്ലാഹി ﷺയെ പരിഹസിച്ചു. അവർ അബൂബക്കർ സിദ്ദീഖ് (റ)വിന്റെ അടുത്ത് ചെന്ന് പറഞ്ഞു: "താങ്കളുടെ സുഹൃത്ത് പറയുന്നത് കേട്ടോ? അദ്ദേഹം രാത്രിക്ക് രാത്രി മസ്ജിദുൽ അഖ്സയിൽ പോയി വന്നു എന്ന് പറയുന്നു!" അബൂബക്കർ (റ) പറഞ്ഞു: "നിങ്ങൾ എന്തിനാണ് അദ്ദേഹത്തെ കളവാക്കുന്നത്? അദ്ദേഹം അങ്ങനെ പറഞ്ഞിട്ടുണ്ടെങ്കിൽ അത് സത്യമാണ്. ഇതിനേക്കാൾ അത്ഭുതകരമായ കാര്യം ആകാശത്ത് നിന്ന് മലക്ക് വഹിയിയുമായി വരുന്നു എന്നത് ഞാൻ വിശ്വസിക്കുന്നുണ്ടല്ലോ." പിന്നീട് അബൂബക്കർ(റ) റസൂലുല്ലാഹി ﷺ)യുടെ അടുത്ത് ചെന്ന് കാര്യങ്ങൾ തിരക്കി. ഈ സംഭവത്തോടെയാണ് നബി(സ) അദ്ദേഹത്തിന് 'സിദ്ദീഖ്' (സത്യസന്ധൻ) എന്ന സ്ഥാനപ്പേര് നൽകിയത്.
ചില പണ്ഡിതന്മാരും വ്യാഖ്യാതാക്കളും മിഅ്റാജ് ശാരീരികമായ യാത്രയല്ല, മറിച്ച് ആത്മീയ യാത്രയോ സ്വപ്നമോ ആണെന്ന് അഭിപ്രായപ്പെടുന്നു. മുൻഗാമികളിൽ ചിലർക്കും ഈ അഭിപ്രായമുണ്ടായിരുന്നു. എന്നാൽ ഭൂരിഭാഗം പണ്ഡിതന്മാരും ഇത് ശാരീരികമായ യാത്ര തന്നെയായിരുന്നു എന്ന് ഉറപ്പിച്ചു പറയുന്നു. കാരണം, ഇതൊരു സ്വപ്നമായിരുന്നെങ്കിൽ മക്കയിലെ നിഷേധികൾക്ക് ഇതിൽ എതിർപ്പ് പ്രകടിപ്പിക്കേണ്ട കാര്യമില്ലല്ലോ. മാത്രമല്ല, ദുർബല വിശ്വാസികൾ മതം ഉപേക്ഷിക്കാനും അത് കാരണമാകുമായിരുന്നില്ല. മിഅ്റാജ് യാത്ര മുസ്ലിംകൾക്ക് വലിയൊരു സന്ദേശമാണ് നൽകുന്നത്.
കവി പറയുന്നു:
"വിചാരണ നാളിൽ പ്രവാചകൻ്റെ സാമീപ്യം വരെ എത്തിച്ചേർന്നു. മംഗളാശംസകൾ! അല്ലാഹുവിൻ്റെ അനുഗ്രഹം സ്വർഗ്ഗത്തോപ്പുകൾ വരെ എത്തി. പ്രവാചകൻ്റെ മിഅ്റാജ് എന്നാൽ അത് അത്യുന്നതമായ അർശ് വരെ എത്തിച്ചേരലാണ്. എൻ്റെ മിഅ്റാജ് എന്നാൽ അത് അവിടുത്തെ പാദങ്ങളിൽ എത്തിച്ചേരലാണ്."
അല്ലാഹു നമുക്കെല്ലാവർക്കും കാര്യങ്ങൾ ശരിയായി മനസ്സിലാക്കാനും നമസ്കാരത്തിലും മറ്റ് ഇതര നന്മകളിലും മുന്നേറാനും ഉതവി നൽകി അനുഗ്രഹിക്കട്ടെ!
🔹🔹🔹🔹🔹🔹🔹
കവർ സ്റ്റോറി
ബഹുമാന്യ ഇമാമുമാരോട്...
✍️ മൗലാനാ സയ്യിദ് ബിലാൽ ഹസനി നദ്വി
(സെക്രട്ടറി, ആൾ ഇന്ത്യാ മുസ്ലിം പേഴ്സണൽ ലോ ബോർഡ്)
ബഹുമാന്യരെ, നിങ്ങൾ മസ്ജിദിലെ ഇമാമുമാരാണ്. ഒരു നഗരത്തെ സംസ്കരിച്ചെടുക്കാനും അതിന് ശരിയായ ദിശാബോധം നൽകാനും ഏറ്റവും വലിയ ഉത്തരവാദിത്തം ഇമാമുമാർക്കും പണ്ഡിതന്മാർക്കുമാണ്. നദ്വത്തുൽ ഉലമ സ്ഥിതി ചെയ്യുന്ന ലഖ്നൗ നഗരം ഇതിനൊരു മാതൃകയാകണം. ഇമാമുമാർ എത്രത്തോളം ഈ ദൗത്യം ഏറ്റെടുക്കുന്നുവോ, അത്രത്തോളം ഈ നഗരത്തിന്റെ അവസ്ഥ മാറും.
ഇന്നത്തെ സാഹചര്യങ്ങൾ വളരെ വിചിത്രമാണ്. നമ്മുടെ പെൺകുട്ടികൾ വഴിതെറ്റിപ്പോകുന്നതും, മതപരിത്യാഗത്തിന്റെ വാർത്തകളും നാം കേൾക്കുന്നു. യുവാക്കളിൽ മതത്തെക്കുറിച്ച് സംശയങ്ങൾ വർദ്ധിച്ചുവരുന്നു. ഈ വെല്ലുവിളികളെ നമുക്ക് നേരിടേണ്ടതുണ്ട്. ഇതിനുള്ള ഏറ്റവും നല്ല പരിഹാരം മഹല്ല് തലത്തിലുള്ള പ്രവർത്തനങ്ങളാണ്. ഓരോ പള്ളിയിലും ജുമുഅ പ്രഭാഷണം, ഖുർആൻ ക്ലാസ്, പ്രാഥമിക മദ്റസ എന്നിവ ഉണ്ടായിരിക്കണം. പള്ളിയുമായി ബന്ധപ്പെട്ട ഓരോ വീടുകളിലും സർവ്വേ നടത്തണം. എത്ര കുട്ടികളുണ്ട്, അവർ എവിടെ പഠിക്കുന്നു, എത്രപേർക്ക് മതവിദ്യാഭ്യാസം ലഭിക്കുന്നില്ല തുടങ്ങിയ കാര്യങ്ങൾ നാം അറിയണം. പെൺകുട്ടികൾക്കായി പ്രത്യേക തർബിയത്ത് സംവിധാനങ്ങൾ ഒരുക്കണം.
സാമ്പത്തികമായി പിന്നാക്കം നിൽക്കുന്നവരെ സഹായിക്കാൻ 'ബൈത്തുൽ മാൽ' സംവിധാനം അത്യാവശ്യമാണ്. മഹല്ലിലെ കഴിവുള്ളവർ വിചാരിച്ചാൽ പാവപ്പെട്ടവരുടെ വിശപ്പും ചികിത്സയും വിവാഹാവശ്യങ്ങളും നിറവേറ്റാൻ സാധിക്കും. നാം അവരെ അവഗണിച്ചാൽ, അവർ മറ്റുള്ളവരുടെ ചൂഷണത്തിന് ഇരയാകാൻ സാധ്യതയുണ്ട്.
ഓർക്കുക, നിങ്ങൾ ഇമാമുമാർ നിൽക്കുന്ന മിഹ്റാബ് റസൂലുല്ലാഹി ﷺയുടേതാണ്. പ്രവാചകന്മാരും ഖലീഫമാരും നമസ്കാരത്തിന് മാത്രമല്ല, ദീനിനും ദുനിയാവിനും നേതൃത്വം നൽകിയവരായിരുന്നു. ജനങ്ങളുടെ പ്രശ്നങ്ങൾ പരിഹരിക്കാൻ അവർ മുന്നിട്ടിറങ്ങിയിരുന്നു. അതുപോലെ, മഹല്ലിലെ ഓരോ വീടും തങ്ങളുടെ ഉത്തരവാദിത്തമാണെന്ന് ഇമാമുമാർ കരുതണം. റസൂലുല്ലാഹി ﷺ തന്റെ അനുചരന്മാരുടെ ക്ഷേമം അന്വേഷിച്ചിരുന്നതുപോലെ, നാമും നമ്മുടെ ജനങ്ങളുടെ സുഖവിവരങ്ങൾ അന്വേഷിക്കണം.
പണക്കാരെയും പാവപ്പെട്ടവരെയും തമ്മിൽ കൂട്ടിയിണക്കാൻ ഇമാമിന് സാധിക്കണം. പാവപ്പെട്ടവരുടെ ആവശ്യങ്ങൾ പണക്കാരെ അറിയിച്ച് അത് പൂർത്തീകരിച്ച് കൊടുക്കണം. ലഖ്നൗ നഗരത്തിൽ നമുക്കൊരു മാതൃക സൃഷ്ടിക്കാൻ കഴിയണം.
മൊബൈൽ ഫോണിന്റെ ദുരുപയോഗം മദ്യത്തേക്കാൾ വലിയ ലഹരിയായി മാറിയിരിക്കുന്നു. ഇത് ആത്മഹത്യകളിലേക്ക് വരെ നയിക്കുന്നു. ഇമാമുമാർ കേവലം അഞ്ച് നേരത്തെ നമസ്കാരത്തിന് മാത്രമല്ല, സമൂഹത്തിന് ദീനീപരമായ നേതൃത്വം നൽകാൻ കൂടിയുള്ളവരാണെന്ന് ഓർക്കുക.
നമുക്ക് 10 സോണുകളിലായി തിരിച്ച് പ്രവർത്തനങ്ങൾ ഏകോപിപ്പിക്കാം. അടുത്ത വർഷത്തേക്ക് കർമ്മ പദ്ധതി തയ്യാറാക്കണം. വർഷം പൂർത്തിയാവുമ്പോൾ നമ്മുടെ പ്രദേശത്തെ ഒരു പള്ളി പോലും നമ്മുടെ ഈ സംവിധാനത്തിന് പുറത്തല്ല എന്ന് ഉറപ്പാക്കാൻ നമുക്ക് സാധിക്കണം. എല്ലാ പള്ളികളിലും ദർസുൽ ഖുർആനും പ്രാഥമിക മദ്റസയും ജുമുഅ പ്രഭാഷണവും നടക്കണം. സ്ത്രീകൾക്കായി കൗൺസിലിംഗ് ക്ലാസുകൾ സംഘടിപ്പിക്കണം.
രണ്ട് കാര്യങ്ങൾ കൂടി പ്രത്യേകം ഉണർത്താൻ ആഗ്രഹിക്കുന്നു. ഒന്നാമതായി ഇസ്ലാമിക് സ്കൂളുകൾ സ്ഥാപിക്കാൻ നാം മുന്നോട്ട് വരണം. നമ്മുടെ കുട്ടികൾക്ക് സുരക്ഷിതമായി പഠിക്കാൻ ഇസ്ലാമിക് സ്കൂളുകൾ അനിവാര്യമാണ്. മറ്റ് സ്കൂളുകളിൽ പോയി വിശ്വാസം നഷ്ടപ്പെടുന്ന അവസ്ഥ ഉണ്ടാകരുത്. അതിനാൽ സ്കൂളുകൾ സ്ഥാപിക്കാൻ നാം മുൻകൈ എടുക്കണം.
രണ്ടാമതായി മാനവികതയുടെ സന്ദേശം പ്രചരിപ്പിക്കുക. നമ്മുടെ സഹോദര സമുദായങ്ങളുമായുള്ള ബന്ധം നാം മെച്ചപ്പെടുത്തണം. അവരെ അവഗണിച്ചാൽ സ്പെയിനിലും മധ്യേഷ്യയിലും സംഭവിച്ചത് ഇവിടെയും ആവർത്തിച്ചേക്കാം. അവിടെ മുസ്ലിംകൾ ഭൂരിപക്ഷത്തെ അവഗണിച്ചപ്പോൾ വലിയ തിരിച്ചടികൾ നേരിടേണ്ടി വന്നു. അതിനാൽ, അയൽവാസികളായ അമുസ്ലിം സഹോദരങ്ങളെയും മറ്റും സ്നേഹത്തോടെ കാണുകയും, അവർക്ക് സേവനങ്ങൾ ചെയ്യുകയും ചെയ്യുക. ചെറിയ 'കോർണർ മീറ്റിംഗുകൾ' നടത്തി സൗഹൃദം പങ്കിടുക. ആശുപത്രികളിൽ പോയി രോഗികളെ സന്ദർശിക്കുക. ഇത് അവരുടെ തെറ്റിദ്ധാരണകൾ മാറാൻ സഹായിക്കും.
നിരാശപ്പെടാതെ പ്രവർത്തിക്കുക. പണ്ഡിതന്മാർ ഉണർന്ന് പ്രവർത്തിച്ചാൽ, ഈ രാജ്യം മറ്റൊരു സ്പെയിൻ ആക്കാൻ ആർക്കും സാധിക്കില്ല. അല്ലാഹുവിന്റെ പ്രീതി മാത്രം കാംക്ഷിച്ചുകൊണ്ട് നാം മുന്നിട്ടിറങ്ങിയാൽ അല്ലാഹു നമ്മെ സഹായിക്കും, വഴികൾ എളുപ്പമാക്കും. അല്ലാഹു നമ്മുടെ പ്രവർത്തനങ്ങളെ സ്വീകരിക്കുമാറാകട്ടെ!
____________________________________
ഇസ്ലാമോഫോബിയ : പരിഹാര മാർഗ്ഗങ്ങൾ
✍️ സയ്യിദ് സആദത്തുല്ലാഹ് ഹുസൈനി
(വൈസ് പ്രസിഡൻറ്, ആൾ ഇന്ത്യാ മുസ്ലിം പേഴ്സണൽ ലോ ബോർഡ്)
സമുദായത്തിലെ വിവിധ സംഘടനകളും സ്ഥാപനങ്ങളും ഒത്തൊരുമിച്ച് ആസൂത്രിതമായ ഒരു ശ്രമം നടത്തേണ്ടതുണ്ട്. ഏത് തലത്തിലായാലും, ജനങ്ങൾ ഇസ്ലാം എന്താണെന്ന് അറിയുന്നത് മാധ്യമങ്ങളിലൂടെയാകരുത്, മറിച്ച് നമ്മളിലൂടെയാകണം. നമ്മുടെ വാക്കുകളിലൂടെയും പ്രവൃത്തികളിലൂടെയും ഇവിടുത്തെ ജനങ്ങൾ ഇസ്ലാമിനെ മനസ്സിലാക്കുന്നത്ര ശക്തമായ ബന്ധങ്ങൾ സ്ഥാപിക്കപ്പെടണം.
ഇസ്ലാമോഫോബിയയുടെ വലിയൊരു കാരണം ഇസ്ലാമിനെക്കുറിച്ചുള്ള അറിവിന് ജനങ്ങൾ മാധ്യമങ്ങളെ ആശ്രയിക്കുന്നു എന്നതാണ്. സാധാരണക്കാർ ഇസ്ലാമിനെയും മുസ്ലീങ്ങളെയും മാധ്യമങ്ങളിലൂടെ മാത്രം മനസ്സിലാക്കാൻ ശ്രമിക്കുമ്പോൾ അവർ തെറ്റിദ്ധാരണകൾക്ക് ഇരയാവുകയും അവരിൽ വെറുപ്പ് ഉടലെടുക്കുകയും ചെയ്യുന്നു. ഇതിനെ മറികടക്കാനുള്ള വഴി മനുഷ്യർ തമ്മിലുള്ള നേരിട്ടുള്ള ബന്ധങ്ങൾ വലിയ തോതിൽ വർദ്ധിപ്പിക്കുക എന്നത് മാത്രമാണ്.
നേരിട്ടുള്ള ബന്ധത്തിലൂടെ അറിയുന്ന കാര്യങ്ങൾ ആർക്കും കൂടുതൽ വിശ്വസനീയമായിരിക്കും. നേരിട്ടുള്ള ബന്ധമില്ലാത്തിടത്താണ് മാധ്യമങ്ങളോ മൂന്നാമതൊരാളോ നൽകുന്ന വിവരങ്ങൾ സ്വാധീനം ചെലുത്തുന്നത്. അതുകൊണ്ട്, നേരിട്ടുള്ള ബന്ധങ്ങൾ വർദ്ധിക്കണം. നമ്മുടെ യുവാക്കൾ ഇതരമതസ്ഥരായ യുവാക്കളുമായി ബന്ധം സ്ഥാപിക്കണം. സ്ത്രീകൾ ഇതരമതസ്ഥരായ സ്ത്രീകളുമായി സൗഹൃദത്തിലാവുകയും ആശയവിനിമയം നടത്തുകയും വേണം. ആശയവിനിമയം വർദ്ധിച്ചാൽ ഈ പ്രശ്നത്തെ നേരിടാൻ എളുപ്പമാകും.
ആശയവിനിമയത്തിൽ ഇസ്ലാമോഫോബിയക്ക് കാരണമാകുന്ന കാര്യങ്ങളെ പ്രത്യേകം മുൻനിർത്തി വേണം സംസാരിക്കാൻ. ചരിത്രത്തെക്കുറിച്ചുള്ള യാഥാർഥ്യങ്ങൾ എന്താണെന്ന് വ്യക്തമാക്കണം. ജിഹാദ്, സ്ത്രീകൾ തുടങ്ങിയ വിഷയങ്ങളിലെ ഇസ്ലാമിക നിയമങ്ങളുടെ യുക്തി ജനങ്ങളെ ബോധ്യപ്പെടുത്തണം. ഇതിനായി അക്കാദമിക് തലത്തിലുള്ള പ്രവർത്തനങ്ങളും നടക്കണം. സെമിനാറുകളിലും സർവ്വകലാശാലകളിലും വൈജ്ഞാനിക സദസ്സുകളിലും നമ്മൾ ഇടംപിടിക്കണം. മാധ്യമ ചർച്ചകളും സോഷ്യൽ മീഡിയ ഇടപെടലുകളും നടക്കണം. എല്ലാത്തിലുമുപരി സിനിമ, കാർട്ടൂൺ, കോമഡി തുടങ്ങിയ ജനപ്രിയ മാധ്യമങ്ങളും ഇതിനായി ഉപയോഗപ്പെടുത്തണം. ഈ കാര്യങ്ങളെല്ലാം നമ്മൾ ചെയ്യേണ്ടതുണ്ട്.
പിന്നീട് നമ്മുടെ സ്വന്തം ജീവിതത്തിലൂടെയും, കുടുംബങ്ങളിലൂടെയും, സ്ഥാപനങ്ങളിലൂടെയും ഇസ്ലാമിൻ്റെ പ്രായോഗിക സാക്ഷ്യവും മാതൃകകളും ജനങ്ങൾക്ക് മുന്നിൽ അവതരിപ്പിക്കണം. ഇസ്ലാമിക അധ്യാപനങ്ങൾ എല്ലാ മനുഷ്യർക്കും ഗുണകരമാണെന്ന് ജനങ്ങൾക്ക് മനസ്സിലാകാൻ ഇത് സഹായിക്കും. ഈ കാര്യങ്ങൾ നിർവഹിക്കാൻ നമ്മൾ സ്വയം പല കാര്യങ്ങളിലും മാറേണ്ടതുണ്ട്. നമ്മുടെ പദവിയും സ്ഥാനവും നമ്മൾ തിരിച്ചറിയണം. നമ്മൾ ദീൻ അനുസരിച്ച് ജീവിക്കുന്നവരും ദീനിൻ്റെ മാതൃകകളുമായി മാറണം. രാഷ്ട്രീയമായും, വിദ്യാഭ്യാസപരമായും, സാമ്പത്തികമായും നമ്മൾ പുരോഗതി കൈവരിക്കണം. രാജ്യത്തിനും സമൂഹത്തിനും നൽകുന്നവരായി നമ്മൾ മാറണം.
വികാരങ്ങൾക്ക് അടിപ്പെടാതെ നമ്മുടെ മുൻഗണനകൾ നിശ്ചയിക്കുകയും, അതിൽ ക്ഷമയോടെ ദീർഘകാല പോരാട്ടത്തിന് തയ്യാറാവുകയും വേണം. ഈ കാര്യങ്ങളിലൂടെയാണ് ഈ വലിയ പ്രശ്നത്തെ നേരിടാൻ ആവശ്യമായ കരുത്ത് നമ്മളിൽ ഉണ്ടാകുക. വിനീതൻ ഓതിയ ആയത്തിലും, ഇസ്ലാമോഫോബിയക്ക് ഇരയാകുന്ന വിശ്വാസികൾക്കുള്ള അല്ലാഹുവിന്റെ ഉപദേശമാണുള്ളത്. ആ ആയത്തിൻ്റെ അർത്ഥം ഇതാണ്: മുസ്ലിംകളെ, സമ്പത്തിലും ശരീരത്തിലും നിങ്ങൾക്ക് പരീക്ഷണങ്ങൾ നേരിടേണ്ടി വരും. വേദക്കാരിൽ നിന്നും ബഹുദൈവാരാധകരിൽ നിന്നും നിങ്ങൾക്ക് ഒട്ടേറെ വേദനിപ്പിക്കുന്ന വാക്കുകൾ കേൾക്കേണ്ടി വരും. ഈ സാഹചര്യങ്ങളിലെല്ലാം നിങ്ങൾ ക്ഷമയും സൂക്ഷ്മതയും (തഖ്വ) കൈവിടാതെ നിലകൊള്ളുന്നുവെങ്കിൽ അത് വലിയ നിശ്ചയദാർഢ്യം ആവശ്യമുള്ള കാര്യമാണ്.'
നിങ്ങൾ ഈ ആയത്തിനെക്കുറിച്ച് ചിന്തിക്കൂ. ഒന്ന്, വേദനിപ്പിക്കുന്ന അനുഭവങ്ങൾ വിശ്വാസികളുടെ പരീക്ഷണത്തിൻ്റെ ഭാഗമാണെന്ന് ഇതിലൂടെ മനസ്സിലാക്കാം. അല്ലാഹു നമ്മെ പരീക്ഷിക്കാൻ ആഗ്രഹിക്കുന്നു എന്നത് അവൻ്റെ പദ്ധതിയുടെ ഭാഗമാണ്. രണ്ടാമതായി, ഇത്തരം സാഹചര്യങ്ങളിൽ നമ്മൾ ക്ഷമയും തഖ്വയും സ്വീകരിക്കണം എന്ന് ഇത് പഠിപ്പിക്കുന്നു.
ക്ഷമ എന്നാൽ ഭീരുത്വമോ ഒളിച്ചോടലോ അല്ല. മറിച്ച്, വികാരങ്ങളുടെ മേൽ ബുദ്ധിയും മതവും നിയന്ത്രണം നേടുന്നതിനെയാണ് ക്ഷമ എന്ന് പറയുന്നത്. വികാരങ്ങൾ നിയന്ത്രണം വിട്ടുപോകുന്നതാണ് അക്ഷമയും എടുത്തുചാട്ടവും. ഖുർആനിലൂടെയും സുന്നത്തിലൂടെയും ലഭിക്കുന്ന വിവേകവും ബുദ്ധിയും ഉപയോഗിച്ച് ഓരോ പ്രവൃത്തിയും തീരുമാനിക്കുന്നതാണ് ക്ഷമ. നമുക്ക് നമ്മുടെ മേൽ പൂർണ്ണ നിയന്ത്രണം ഉണ്ടായിരിക്കണം. കൃത്യമായ ബോധ്യത്തിൻ്റെയും മതപരമായ തീരുമാനത്തിൻ്റെയും അടിസ്ഥാനത്തിലല്ലാതെ ഒരു ചുവടുപോലും വെക്കരുത്. നമ്മൾ പ്രകോപിതരാകരുത്. തഖ്വ എന്നാൽ ദൈവത്തിൻ്റെ മതത്തെക്കുറിച്ചുള്ള അറിവോടും നമ്മുടെ സ്ഥാനത്തെക്കുറിച്ചുള്ള ബോധത്തോടും കൂടി പ്രവർത്തിക്കുക എന്നതാണ്. ഇതിലാണ് നമ്മുടെ വിജയത്തിൻ്റെ രഹസ്യം അടങ്ങിയിരിക്കുന്നത്."
🔹🔹🔹🔹🔹
മആരിഫുൽ ഖുര്ആന്
സൂറത്തുൽ മുൽക്
(30 ആയത്തുകൾ, പദങ്ങൾ 330, അക്ഷരങ്ങൾ 1313, മക്കാമുകർറമയിൽ അവതരണം. 3 റുകൂഅ്. അവതരണ ക്രമം 77. പാരായണ ക്രമം 67. സൂറത്തുത്ത്വൂറിന് ശേഷം അവതരണം)
പടച്ചവന്റെ മഹത്വം, നിഷേധത്തിന്റെ അന്ത്യം, ഭയഭക്തരുടെ വിജയം, പടച്ചവന്റെ വിശാലമായ അറിവും കഴിവും വിളിച്ചറിയിക്കുന്ന ദൃഷ്ടാന്തങ്ങൾ, അശ്രദ്ധർക്ക് മുന്നറിയിപ്പ്
✍️ മൗലാനാ മുഫ്തി മുഹമ്മദ് ശഫീഅ് ഉസ്മാനി
ആയത്ത് 01-15
﷽
എല്ലാവരോടും കരുണയുള്ളവനും ഏറ്റവും വലിയ കാരുണ്യവാനുമായ അല്ലാഹുവിന്റെ നാമത്തില് ആരംഭം
تَبَٰرَكَ ٱلَّذِي بِيَدِهِ ٱلۡمُلۡكُ وَهُوَ عَلَىٰ كُلِّ شَيۡءٖ قَدِيرٌ ١ ٱلَّذِي خَلَقَ ٱلۡمَوۡتَ وَٱلۡحَيَوٰةَ لِيَبۡلُوَكُمۡ أَيُّكُمۡ أَحۡسَنُ عَمَلٗاۚ وَهُوَ ٱلۡعَزِيزُ ٱلۡغَفُورُ ٢ ٱلَّذِي خَلَقَ سَبۡعَ سَمَٰوَٰتٖ طِبَاقٗاۖ مَّا تَرَىٰ فِي خَلۡقِ ٱلرَّحۡمَٰنِ مِن تَفَٰوُتٖۖ فَٱرۡجِعِ ٱلۡبَصَرَ هَلۡ تَرَىٰ مِن فُطُورٖ ٣ ثُمَّ ٱرۡجِعِ ٱلۡبَصَرَ كَرَّتَيۡنِ يَنقَلِبۡ إِلَيۡكَ ٱلۡبَصَرُ خَاسِئٗا وَهُوَ حَسِيرٞ ٤ وَلَقَدۡ زَيَّنَّا ٱلسَّمَآءَ ٱلدُّنۡيَا بِمَصَٰبِيحَ وَجَعَلۡنَٰهَا رُجُومٗا لِّلشَّيَٰطِينِۖ وَأَعۡتَدۡنَا لَهُمۡ عَذَابَ ٱلسَّعِيرِ ٥ وَلِلَّذِينَ كَفَرُواْ بِرَبِّهِمۡ عَذَابُ جَهَنَّمَۖ وَبِئۡسَ ٱلۡمَصِيرُ ٦ إِذَآ أُلۡقُواْ فِيهَا سَمِعُواْ لَهَا شَهِيقٗا وَهِيَ تَفُورُ ٧ تَكَادُ تَمَيَّزُ مِنَ ٱلۡغَيۡظِۖ كُلَّمَآ أُلۡقِيَ فِيهَا فَوۡجٞ سَأَلَهُمۡ خَزَنَتُهَآ أَلَمۡ يَأۡتِكُمۡ نَذِيرٞ ٨ قَالُواْ بَلَىٰ قَدۡ جَآءَنَا نَذِيرٞ فَكَذَّبۡنَا وَقُلۡنَا مَا نَزَّلَ ٱللَّهُ مِن شَيۡءٍ إِنۡ أَنتُمۡ إِلَّا فِي ضَلَٰلٖ كَبِيرٖ ٩ وَقَالُواْ لَوۡ كُنَّا نَسۡمَعُ أَوۡ نَعۡقِلُ مَا كُنَّا فِيٓ أَصۡحَٰبِ ٱلسَّعِيرِ ١٠ فَٱعۡتَرَفُواْ بِذَنۢبِهِمۡ فَسُحۡقٗا لِّأَصۡحَٰبِ ٱلسَّعِيرِ ١١ إِنَّ ٱلَّذِينَ يَخۡشَوۡنَ رَبَّهُم بِٱلۡغَيۡبِ لَهُم مَّغۡفِرَةٞ وَأَجۡرٞ كَبِيرٞ ١٢ وَأَسِرُّواْ قَوۡلَكُمۡ أَوِ ٱجۡهَرُواْ بِهِۦٓۖ إِنَّهُۥ عَلِيمُۢ بِذَاتِ ٱلصُّدُورِ ١٣ أَلَا يَعۡلَمُ مَنۡ خَلَقَ وَهُوَ ٱللَّطِيفُ ٱلۡخَبِيرُ ١٤ هُوَ ٱلَّذِي جَعَلَ لَكُمُ ٱلۡأَرۡضَ ذَلُولٗا فَٱمۡشُواْ فِي مَنَاكِبِهَا وَكُلُواْ مِن رِّزۡقِهِۦۖ وَإِلَيۡهِ ٱلنُّشُورُ ١٥
എല്ലാ സൃഷ്ടികളുടെയും രാജാധിപത്യം കൈയ്യാളുന്ന അല്ലാഹു ഐശ്വര്യപൂർണ്ണനാണ്. അവൻ എല്ലാ കാര്യങ്ങളുടെ മേലും കഴിവുള്ളവനാണ്.(1) നിങ്ങളിൽ ആരാണ് ഏറ്റവും നല്ല കർമ്മങ്ങൾ ചെയ്യുന്നതെന്ന് പരിശോധിക്കുന്നതിനു വേണ്ടി അല്ലാഹു മരണത്തെയും ജീവിതത്തെയും നിശ്ചയിച്ചു. അല്ലാഹു വലിയ പ്രതാപശാലിയും വളരെയധികം പൊറുക്കുന്നവനുമാണ്.(2) ഏഴ് ആകാശങ്ങളെ ഒന്നിനുമീതെ ഒന്നായി സൃഷ്ടിച്ചവനാണവൻ. കാരുണ്യവാനായ അല്ലാഹുവിന്റെ സൃഷ്ടിപ്പിൽ യാതൊരു ഏറ്റക്കുറച്ചിലും നിങ്ങൾക്ക് കാണാൻ സാധിക്കുകയില്ല. (അതിന്) എന്തെങ്കിലും വിള്ളലുകൾ ഉണ്ടോയെന്ന് പലപ്രാവശ്യം ആവർത്തിച്ചുനോക്കിക്കൊള്ളുക.(3) വീണ്ടും പലപ്രാവശ്യം അല്ലാഹുവിന്റെ സൃഷ്ടിയിലേക്ക് നോക്കുക. താങ്കളുടെ കണ്ണുകൾ തളർന്ന് പരാജയപ്പെട്ട് താങ്കളിലേക്ക് മടങ്ങുന്നതാണ്.(4) ഭൂമിയോട് അടുത്ത ആകാശത്തെ (നക്ഷത്രങ്ങളാകുന്ന) വിളക്കുകൾ കൊണ്ട് നാം അലങ്കരിച്ചു. നാം അവയെ പിശാചുക്കളെ എറിയുന്ന ആയുധവുമാക്കി, അവർക്ക് കത്തിയാളുന്ന നരക ശിക്ഷ നാം ഒരുക്കി വെച്ചിരിക്കുന്നു.(5) തങ്ങളുടെ രക്ഷിതാവിനെ നിഷേധിക്കുന്നവർക്ക് നരകത്തിന്റെ ശിക്ഷയുണ്ട്. എത്തിച്ചേരുന്ന സ്ഥലം മഹാമോശമാണ്.(6) നരകത്തിലേക്ക് നിഷേധികളെ തള്ളപ്പെടുമ്പോൾ അതിൽ വലിയ അലർച്ച അവർ കേൾക്കുന്നതാണ്. അത് തിളച്ച് മറിഞ്ഞുകൊണ്ടിരിക്കുന്നതുമാണ്.(7) കോപത്തിന്റെ കടുപ്പം കാരണം അത് പൊട്ടിത്തെറിക്കാൻ അടുക്കും. അതിലേക്ക് ഓരോ സംഘങ്ങളെയും ഇടപ്പെടുമ്പോൾ അതിന്റെ സൂക്ഷിപ്പുകാർ അവരോട് ചോദിക്കും: മുന്നറിയിപ്പ് നൽകുന്ന ആരും നിങ്ങളുടെ അരികിൽ വന്നിരുന്നില്ലേ?(8) അവർ പറയും: തീർച്ചയായും മുന്നറിയിപ്പ് നൽകുന്നവർ ഞങ്ങളുടെ അരികിൽ വന്നിരുന്നു, പക്ഷേ ഞങ്ങൾ അവരെ കളവാക്കുകയും ഇപ്രകാരം പറയുകയും ചെയ്തു: അല്ലാഹു ഒന്നും അവതരിപ്പിച്ചിട്ടില്ല. നിങ്ങൾ വലിയ വഴികേടിൽ തന്നെയാണ്.(9) അവർ ഇപ്രകാരവും പറയും: സത്യം കേൾക്കുകയും മനസ്സിലാക്കുകയും ചെയ്തിരുന്നെങ്കിൽ ഞങ്ങൾ നരകവാസികളിൽപ്പെടില്ലായിരുന്നു.(10) ചുരുക്കത്തിൽ അവരുടെ പാപങ്ങൾ അവർ തുറന്ന് സമ്മതിക്കും, നരകവാസികളുടെ മേൽ ശാപം മാത്രമുണ്ടാകുന്നതാണ്.(11) തങ്ങളുടെ രക്ഷിതാവിനെ കാണാതെ തന്നെ ഭയന്ന് ജീവിക്കുന്നവർക്ക് പാപമോചനവും വലിയ പ്രതിഫലവുമുണ്ട്.(12) നിങ്ങൾ ശബ്ദമില്ലാതെയോ ശബ്ദത്തോടെയോ സംസാരിച്ചു കൊള്ളുക, തീർച്ചയായും അല്ലാഹു മനസ്സിലുള്ള കാര്യങ്ങൾ പോലും അറിയുന്നവനാണ്.(13) എല്ലാം സൃഷ്ടിച്ചവൻ എല്ലാം അറിയുന്നവനല്ലേ? അതെ അല്ലാഹു വളരെ സൂക്ഷ്മമായി കാര്യങ്ങൾ അറിയുന്നവനും എല്ലാ രഹസ്യങ്ങളും മനസ്സിലാക്കുന്നവനുമാണ്.(14) അല്ലാഹുവാണ് നിങ്ങൾക്ക് ഭൂമിയെ ഒരുക്കിത്തന്നത്. ആകയാൽ അതിന്റെ വഴികളിലൂടെ നിങ്ങൾ നടക്കുക. അല്ലാഹു നൽകിയ ഉപജീവനങ്ങൾ ഉപയോഗിക്കുക. എല്ലാവരും അല്ലാഹുവിലേക്ക് മടങ്ങി പുനർജ്ജീവിപ്പിക്കപ്പെടുന്നതാണ്.(15) ആകാശത്തിന്റെ ഉടമസ്ഥനായ അല്ലാഹു ഭൂമിയിൽ നിങ്ങളെ ആഴ്ത്തിക്കളയുന്നതിൽ നിന്നും അങ്ങനെ ഭൂമി ഇളകി നിങ്ങളെ വിഴുങ്ങിക്കളയുന്നതിൽ നിന്നും നിങ്ങൾ നിർഭയരായി കഴിയുകയാണോ?(16) അല്ലെങ്കിൽ ആകാശത്തിന്റെ ഉടമസ്ഥനായ അല്ലാഹു നിങ്ങളുടെ മേൽ കല്ലുമഴ വർഷിപ്പിക്കുന്നതിൽ നിന്നും നിങ്ങൾ നിർഭയരായിക്കഴിയുകയാണോ? എന്റെ താക്കീത് എങ്ങനെയുണ്ടെന്ന് പിന്നീട് നിങ്ങൾ മനസ്സിലാക്കുന്നതാണ്.(17) ഇതിനു മുമ്പുള്ളവരും സത്യത്തെ കളവാക്കിയിരുന്നു, അപ്പോൾ എന്റെ ശിക്ഷ എങ്ങനെയായിരുന്നു.(18) അവരുടെ മുകളിൽ ചിറകുകൾ വിരിച്ചുകൊണ്ടും മടക്കിയും പറക്കുന്ന പറവകളെ അവർ കാണുന്നില്ലേ? കാരുണ്യവാനായ അല്ലാഹുവാണ് അന്തരീക്ഷത്തിൽ അതിനെ നിയന്ത്രിച്ചു നിർത്തുന്നത്. തീർച്ചയായും അല്ലാഹു എല്ലാ കാര്യങ്ങളും കാണുന്നവനാണ്.(19) കാരുണ്യവാനായ അല്ലാഹു അല്ലാതെ നിങ്ങളെ സഹായിക്കുന്ന ഏതെങ്കിലും സൈന്യം നിങ്ങൾക്കുണ്ടോ? നിഷേധികൾ വലിയ വഞ്ചനയിൽ തന്നെയാണ്.(20) ഇനി അല്ലാഹു അവന്റെ ഉപജീവനത്തെ തടഞ്ഞുവെക്കുകയാണെങ്കിൽ നിങ്ങൾക്ക് ഉപജീവനം നൽകാൻ ആരെങ്കിലുമുണ്ടോ? കാര്യം ഇതായിട്ടും നിഷേധികൾ ധിക്കാരത്തിലും വെറുപ്പിലും കഴിയുകയാണ്.(21) മുഖം കുത്തി തലതിരിഞ്ഞ് നടക്കുന്നവനാണോ? സന്മാർഗ്ഗത്തിലൂടെ നേരെ സഞ്ചരിക്കുന്നവനാണോ? സന്മാർഗ്ഗം പ്രാപിച്ചവൻ?(22) പറയുക: അല്ലാഹുവാണ് നിങ്ങളെ പടച്ചത് അവൻ തന്നെ നിങ്ങൾക്ക് കണ്ണും കാതും ഹൃദയവും നൽകി പക്ഷേ നിങ്ങൾ കുറച്ച് മാത്രമേ നന്ദി കാണിക്കുന്നുള്ളൂ.(23) പറയുക: അവനാണ് നിങ്ങളെ ഭൂമിയിൽ പരത്തിയത്. അവനിലേക്കാണ് നിങ്ങൾ എല്ലാവരും ഒരുമിച്ചുകൂട്ടപ്പെടുന്നത്.(24) അവർ ചോദിക്കുന്നു: നിങ്ങൾ സത്യസന്ധരാണെങ്കിൽ ഈ വാഗ്ദാനം എപ്പോഴാണ് പുലരുക?(25) പറയുക: യഥാർത്ഥ അറിവ് അല്ലാഹുവിന് മാത്രമാണ്. ഞാൻ വളരെ വ്യക്തമായി മുന്നറിയിപ്പ് നൽകുന്നവൻ മാത്രമാണ്.(26) അല്ലാഹുവിന്റെ ശിക്ഷ അടുത്തു വന്നതായി കാണുമ്പോൾ നിഷേധികളുടെ മുഖങ്ങൾ വാടിപ്പോകുന്നതാണ്. അപ്പോൾ അവരോട് പറയപ്പെടും: നിങ്ങൾ ആവശ്യപ്പെട്ടിരുന്ന ശിക്ഷ ഇതുതന്നെയാണ്(27) അവരോട് പറയുക: അല്ലാഹു എന്നെയും എന്റെ കൂട്ടുകാരെയും നശിപ്പിക്കുകയോ ഞങ്ങളോട് കരുണകാണിക്കുകയോ ചെയ്തുവെന്നിരിക്കട്ടെ, എന്നാൽ നിഷേധികളെ വേദനാജനകമായ ശിക്ഷയിൽ നിന്നും ആരായിരിക്കും രക്ഷപ്പെടുത്തുക?(28) പറയുക: അല്ലാഹു എല്ലാവരോടും കരുണയുള്ളവനാണ്. ഞങ്ങൾ അവനിൽ വിശ്വസിച്ചിരിക്കുന്നു, അവന്റെ മേൽ ഭരമേൽപ്പിച്ചിരിക്കുന്നു. ആരാണ് വ്യക്തമായ വഴികേടിൽ എന്ന് പിന്നീട് നിങ്ങൾ മനസ്സിലാക്കുന്നതാണ്.(29) അവരോട് ചോദിക്കുക: നിങ്ങളുടെ (കിണറുകളിലും മറ്റുമുള്ള) വെള്ളം വറ്റിപ്പോയാൽ നിങ്ങൾക്ക് ശുദ്ധജലം കൊണ്ടുതരുന്നത് ആരാണ്?(30)
ആശയ സംഗ്രഹം:
എല്ലാ സൃഷ്ടികളുടെയും രാജാധിപത്യം കൈയ്യാളുന്ന അല്ലാഹു ഐശ്വര്യപൂർണ്ണനാണ്. അവൻ എല്ലാ കാര്യങ്ങളുടെ മേലും കഴിവുള്ളവനാണ്. നിങ്ങളിൽ ആരാണ് ഏറ്റവും നല്ല കർമ്മങ്ങൾ ചെയ്യുന്നതെന്ന് പരിശോധിക്കുന്നതിനു വേണ്ടി അല്ലാഹു മരണത്തെയും ജീവിതത്തെയും നിശ്ചയിച്ചു. മരണവുമായി സൽപ്രവർത്തനത്തിന്റെ ബന്ധം ഇപ്രകാരമാണ്: മരണത്തെയും ഇഹലോകത്തിന്റെ നശ്വരതയെയും പരലോകത്തിന്റെ ഗൗരവത്തെയും ഓർത്തുകൊണ്ട് പരലോക പ്രതിഫലം ലഭിക്കുന്നതിന് വേണ്ടിയും അവിടുത്ത ശിക്ഷയിൽ നിന്നും രക്ഷപ്പെടുന്നതിനും മനുഷ്യൻ പരിശ്രമിക്കുന്നതാണ്. ഇപ്രകാരം ജീവിതത്തെ പ്രവർത്തിക്കാനുള്ള അവസരമായി കണ്ട് സൽപ്രവർത്തനങ്ങളിൽ മുഴുകുന്നതാണ്. ചുരുക്കത്തിൽ പ്രവർത്തനങ്ങൾ നന്നാകുന്നതിന് മരണം നിബന്ധനയും ജീവിതം നന്നാക്കാനുള്ള സ്ഥാനവുമാണ്. അല്ലാഹു വലിയ പ്രതാപശാലിയും വളരെയധികം പൊറുക്കുന്നവനുമാണ്. ദുഷ്പ്രവർത്തനങ്ങളുടെ പേരിൽ ശിക്ഷിക്കുകയും സൽപ്രവർത്തനങ്ങളുടെ പേരിൽ പാപമോചനവും പ്രതിഫലവും കനിഞ്ഞരുളുന്നതുമാണ്. ഏഴ് ആകാശങ്ങളെ ഒന്നിനുമീതെ ഒന്നായി സൃഷ്ടിച്ചവനാണവൻ. ഒരു ആകാശത്തിന് ശേഷം കുറേ സ്ഥലം കഴിഞ്ഞാണ് അടുത്ത ആകാശമുള്ളതെന്ന് ഒരു ഹദീസിൽ വന്നിരിക്കുന്നു. അടുത്തതായി ആകാശത്തിന്റെ ശക്തിയെക്കുറിച്ച് വിവരിക്കുന്നു: അല്ലയോ, നോക്കുന്ന മനുഷ്യാ, കാരുണ്യവാനായ അല്ലാഹുവിന്റെ സൃഷ്ടിപ്പിൽ യാതൊരു ഏറ്റക്കുറച്ചിലും നിങ്ങൾക്ക് കാണാൻ സാധിക്കുകയില്ല. ആകയാൽ അതിന് എന്തെങ്കിലും വിള്ളലുകൾ ഉണ്ടോയെന്ന് പലപ്രാവശ്യം ആവർത്തിച്ചുനോക്കിക്കൊള്ളുക. അതായത് ചിന്തയില്ലാതെ പലപ്രാവശ്യം നോക്കിയിട്ടുണ്ടായിരിക്കും. ഇപ്പോൾ ചിന്തയോടെ നോക്കുക. വീണ്ടും പലപ്രാവശ്യം അല്ലാഹുവിന്റെ സൃഷ്ടിയിലേക്ക് നോക്കുക. താങ്കളുടെ കണ്ണുകൾ അവസാനം തളർന്ന് പരാജയപ്പെട്ട് താങ്കളിലേക്ക് മടങ്ങുന്നതാണ്. യാതൊരു ന്യൂനതയും കാണുന്നതല്ല. അതെ, അല്ലാഹു ഉദ്ദേശിക്കുന്നതുപോലെ കാര്യങ്ങൾ ഉണ്ടാക്കുന്നു. ആകാശത്തെ ഉറപ്പുള്ളതാക്കാൻ അല്ലാഹു ഉദ്ദേശിച്ചു. ഇത്ര കാലഘട്ടം കഴിഞ്ഞിട്ടും ഇന്നുവരെ അതിൽ യാതൊരു കുഴപ്പവും ഉണ്ടായിട്ടില്ല. ഇപ്രകാരം ഏതെങ്കിലും വസ്തുവിനെ ബലഹീനമായ നിലയിൽ പടയ്ക്കാൻ ഉദ്ദേശിച്ചാൽ അങ്ങനെയും സൃഷ്ടിക്കുന്നതാണ്. ചുരുക്കത്തിൽ അല്ലാഹു എല്ലാത്തിനും കഴിവുള്ളവനാണ്. അല്ലാഹുവിന്റെ അപാരമായ കഴിവ് വിളിച്ചറിയിക്കുന്ന മറ്റൊരു തെളിവ് വിവരിക്കുന്നു: ഭൂമിയോട് അടുത്ത ആകാശത്തെ നക്ഷത്രങ്ങളാകുന്ന വിളക്കുകൾ കൊണ്ട് നാം അലങ്കരിച്ചു. നാം അവയെ പിശാചുക്കളെ എറിയുന്ന ആയുധവുമാക്കി. ഇതിന്റെ വിവരണം സൂറത്തുൽ ഹിജ്റിന്റെ തുടക്കത്തിൽ കഴിഞ്ഞിട്ടുണ്ട്. പിശാചുക്കൾക്ക് ഇഹലോകത്ത് ഇപ്രകാരമുള്ള തീ ജ്വാലകൊണ്ടുള്ള ഏറ് കൂടാതെ, അവരുടെ നിഷേധം കാരണം പരലോകത്ത് കത്തിയാളുന്ന നരക ശിക്ഷ നാം ഒരുക്കി വെച്ചിരിക്കുന്നു. തങ്ങളുടെ രക്ഷിതാവിന്റെ ഏകത്വം നിഷേധിക്കുന്നവർക്ക് നരകത്തിന്റെ ശിക്ഷയുണ്ട്. എത്തിച്ചേരുന്ന സ്ഥലം മഹാമോശമാണ്. നരകത്തിലേക്ക് നിഷേധികളെ തള്ളപ്പെടുമ്പോൾ അതിൽ വലിയ അലർച്ച അവർ കേൾക്കുന്നതാണ്. അത് തിളച്ച് മറിഞ്ഞുകൊണ്ടിരിക്കുന്നതുമാണ്. കോപത്തിന്റെ കടുപ്പം കാരണം അത് പൊട്ടിത്തെറിക്കാൻ അടുക്കുന്നതാണ്. ഒന്നുങ്കിൽ അല്ലാഹു അതിൽ ദേഷ്യം പടയ്ക്കുകയും അങ്ങനെ അത് നരകവാസികളുടെ മേൽ ദേഷ്യപ്പെടുകയും ചെയ്യുന്നതാണ്. അല്ലെങ്കിൽ ഇത് ഉദാഹരണത്തിന് വേണ്ടിയുള്ള പ്രയോഗമായിരിക്കാം. അതായത് ആരെങ്കിലും ദേഷ്യപ്പെട്ട് പൊട്ടിത്തെറിക്കുന്നതുപോലെ നരകവും തിളച്ച് മറിയുന്നതാണ്. അതിലേക്ക് നിഷേധികളുടെ ഓരോ സംഘങ്ങളെയും ഇടപ്പെടുമ്പോൾ അതിന്റെ സൂക്ഷിപ്പുകാർ അവരോട് ചോദിക്കും: അല്ലാഹുവിന്റെ ശിക്ഷയിൽ നിന്നും മുന്നറിയിപ്പ് നൽകുന്ന പ്രവാചകന്മാർ ആരും നിങ്ങളുടെ അരികിൽ വന്നിരുന്നില്ലേ? അങ്ങനെ നിങ്ങൾ ഭയഭക്തി പുലർത്തുകയും രക്ഷാമാർഗ്ഗം സ്വീകരിക്കുകയും ചെയ്തില്ലേ? ഇത് അവരെ ഉത്തരം മുട്ടിക്കാനുള്ള ചോദ്യമാണ്. അതെ, പ്രവാചകന്മാർ തീർച്ചയായും വന്നിരുന്നു! ഇപ്രകാരം ഓരോ നിഷേധികളുടെ വിഭാഗങ്ങളോട് ചോദിക്കപ്പെടുന്നതാണ്. തിന്മകളുടെ ഏറ്റക്കുറച്ചിലുകൾക്ക് അനുസരിച്ച് നിഷേധികൾ ഒന്നിന് പുറകെ ഒന്നായിട്ടായിരിക്കും അവർ നരകത്തിലേക്ക് പോകുന്നത്. അപ്പോൾ അവർ പറയും: തീർച്ചയായും മുന്നറിയിപ്പ് നൽകുന്നവർ ഞങ്ങളുടെ അരികിൽ വന്നിരുന്നു, പക്ഷേ ഞങ്ങളുടെ കുഴപ്പം കാരണം അവരെ കളവാക്കുകയും ഇപ്രകാരം പറയുകയും ചെയ്തു: അല്ലാഹു ഗ്രന്ഥങ്ങളും സന്ദേശങ്ങളും ഒന്നും അവതരിപ്പിച്ചിട്ടില്ല. നിങ്ങൾ വലിയ വഴികേടിൽ തന്നെയാണ്. തദവസരം അവർ മലക്കുകളോട് ഇപ്രകാരവും പറയും: പ്രവാചകന്മാർ പറഞ്ഞ സത്യം കേൾക്കുകയും മനസ്സിലാക്കുകയും ചെയ്തിരുന്നെങ്കിൽ ഞങ്ങൾ നരകവാസികളിൽപ്പെടില്ലായിരുന്നു. ചുരുക്കത്തിൽ അവരുടെ പാപങ്ങൾ അവർ തുറന്ന് സമ്മതിക്കും. നരകവാസികളുടെ കടുത്ത ശാപമുണ്ടാകുന്നതാണ്. തങ്ങളുടെ രക്ഷിതാവിനെ കാണാതെ തന്നെ ഭയക്കുകയും അനുസരിച്ച് ജീവിക്കുകയും ചെയ്യുന്നവർക്ക് പാപമോചനവും വലിയ പ്രതിഫലവുമുണ്ട്. നിങ്ങൾ ശബ്ദമില്ലാതെയോ ശബ്ദത്തോടെയോ സംസാരിച്ചു കൊള്ളുക, അതെല്ലാം അല്ലാഹു അറിയുന്നതാണ്. കാരണം തീർച്ചയായും അല്ലാഹു മനസ്സിലുള്ള കാര്യങ്ങൾ പോലും അറിയുന്നവനാണ്. എല്ലാം സൃഷ്ടിച്ചവൻ എല്ലാം അറിയുന്നവനല്ലേ? അതെ അല്ലാഹു വളരെ സൂക്ഷ്മമായി കാര്യങ്ങൾ അറിയുന്നവനും എല്ലാ രഹസ്യങ്ങളും മനസ്സിലാക്കുന്നവനുമാണ്. ചുരുക്കത്തിൽ അല്ലാഹു എല്ലാ വസ്തുക്കളും സൃഷ്ടിച്ചവനും പരിപൂർണ്ണ സ്വാതന്ത്ര്യമുള്ളവനുമാണ്. നിങ്ങളുടെ വാചകങ്ങളും അവസ്ഥകളും അല്ലാഹുവാണ് സൃഷ്ടിക്കുന്നത്. പടച്ചവന്റെ അറിവും അനുമതിയും കൂടാതെ, ഒന്നും ഉണ്ടാകുന്നതല്ല. അല്ലാഹു എല്ലാ കാര്യങ്ങളെക്കുറിച്ചും അറിയുന്നവനാണ്. എല്ലാവർക്കും അതിനനുസരിച്ച് പ്രതിഫലം നൽകുന്നതുമാണ്. വലിയ ഉപകാരിയായ അല്ലാഹുവാണ് നിങ്ങൾ വിവിധ നിലയിൽ പ്രയോജനപ്പെടുത്തുന്നതിന് വേണ്ടി നിങ്ങൾക്ക് ഭൂമിയെ ഒരുക്കിത്തന്നത്. ആകയാൽ അതിന്റെ വഴികളിലൂടെ നിങ്ങൾ നടക്കുക. ശേഷം ഭൂമിയിൽ അല്ലാഹു ഉൽപ്പാദിപ്പിച്ച ഉപജീവനങ്ങൾ ഉപയോഗിക്കുക. അവ ഉപയോഗിക്കുന്നതിനോടൊപ്പം എല്ലാവരും അല്ലാഹുവിങ്കൽ രണ്ടാമത് ജീവിപ്പിക്കപ്പെടും എന്ന കാര്യം ഓർക്കുകയും പടച്ചവന് നന്ദി രേഖപ്പെടുത്തുകയും സത്യവിശ്വാസം സ്വീകരിക്കുകയും സൽക്കർമ്മങ്ങൾ അനുഷ്ടിക്കുകയും ചെയ്യുക. ആകാശത്തിന്റെ ഉടമസ്ഥനും പരിപാലകനുമായ അല്ലാഹു ഖാറൂനിനെ ആഴ്ത്തിയതുപോലെ ഭൂമിയിൽ നിങ്ങളെ ആഴ്ത്തിക്കളയുന്നതിൽ നിന്നും അങ്ങനെ ഭൂമി ഇളകി നിങ്ങളെ വിഴുങ്ങിക്കളയുന്നതിൽ നിന്നും നിങ്ങൾ നിർഭയരായി കഴിയുകയാണോ? അല്ലെങ്കിൽ ആകാശത്തിന്റെ ഉടമസ്ഥനായ അല്ലാഹു ആദ് സമൂഹത്തെപ്പോലെ നിങ്ങളുടെ മേൽ കല്ലുമഴ വർഷിപ്പിക്കുകയും അങ്ങനെ നിങ്ങൾ നശിച്ച് പോകുകയും ചെയ്യുന്നതിൽ നിന്നും നിങ്ങൾ നിർഭയരായിക്കഴിയുകയാണോ? ഇനി എന്തെങ്കിലും നന്മയുടെ പേരിൽ ഉടനടി നിങ്ങളെ ശിക്ഷിക്കാതിരുന്നാൽ തന്നെ, എന്റെ ശിക്ഷകൊണ്ടുള്ള മുന്നറിയിപ്പ് എങ്ങനെയുണ്ടെന്ന് അടുത്ത് തന്നെ മരണത്തോടെ നിങ്ങൾ മനസ്സിലാക്കുന്നതാണ്. നിഷേധത്തിന്റെ പേരിലുള്ള ശിക്ഷയുടെ ധാരാളം മാതൃകകൾ മുൻകാലങ്ങളിൽ കഴിഞ്ഞ് പോയിട്ടുണ്ട്. അതെ, ഇതിന് മുമ്പുള്ളവരും സത്യത്തെ കളവാക്കിയിരുന്നു, അപ്പോൾ എന്റെ ശിക്ഷ എങ്ങനെ സംഭവിച്ചു എന്ന് നിങ്ങൾ നോക്കുക. നിഷേധം അങ്ങേയറ്റം വെറുക്കപ്പെട്ടതാണെന്ന് അതിൽ നിന്നും വ്യക്തമാകുന്നു. ഇനി എന്തെങ്കിലും നന്മയുടെ പേരിൽ അത് ഉടനടി സംഭവിക്കാതിരുന്നാൽ തന്നെ പിന്നീട് സംഭവിക്കുന്നതാണ്! കഴിഞ്ഞ ആയത്തുകളിൽ ആദ്യം ആകാശത്തിന്റെ ദൃഷ്ടാന്തങ്ങളും ശേഷം ഭൂമിയുടെ ദൃഷ്ടാന്തങ്ങളും വിവരിച്ച് പടച്ചവന്റെ ഏകത്വം സമർത്ഥിക്കുകയുണ്ടായി. ഇനി അടുത്തതായി ആകാശത്തിന്റെ അന്തരീക്ഷവുമായി ബന്ധപ്പെട്ട തെളിവുകൾ വിവരിക്കുന്നു: അവരുടെ മുകളിൽ ചിറകുകൾ വിരിച്ചുകൊണ്ടും മടക്കിയും പറക്കുന്ന പറവകളെ അവർ കാണുന്നില്ലേ? രണ്ടവസ്ഥകളിലും അവയ്ക്ക് വലിയ ഭാരമുണ്ടായിരുന്നിട്ടും അവർ അന്തരീക്ഷത്തിൽ പറന്നുകൊണ്ടിരിക്കുന്നു. ഭൂമിയിൽ മറിഞ്ഞ് വീഴുന്നില്ല. കാരുണ്യവാനായ അല്ലാഹുവാണ് അന്തരീക്ഷത്തിൽ അതിനെ നിയന്ത്രിച്ചു നിർത്തുന്നത്. തീർച്ചയായും അല്ലാഹു എല്ലാ കാര്യങ്ങളും കാണുന്നവനാണ്. അവൻ ഉദ്ദേശിക്കുന്നതുപോലെ പ്രവർത്തിക്കുന്നു. അല്ലാഹുവിന്റെ ശക്തി വൈഭവങ്ങൾ മനസ്സിലാക്കിയ ശേഷം നിങ്ങൾ പറയുക: കാരുണ്യവാനായ അല്ലാഹു അല്ലാതെ നിങ്ങളെ അപകടങ്ങളിൽ നിന്നും രക്ഷിക്കുന്ന ഏതെങ്കിലും സൈന്യം നിങ്ങൾക്കുണ്ടോ? വ്യാജ ദൈവങ്ങൾ രക്ഷിക്കുമെന്ന് വിചാരിക്കുന്ന നിഷേധികൾ വലിയ വഞ്ചനയിൽ തന്നെയാണ്. ഇനി അല്ലാഹു അവന്റെ ഉപജീവനത്തെ തടഞ്ഞുവെക്കുകയാണെങ്കിൽ നിങ്ങൾക്ക് ഉപജീവനം നൽകാൻ ആരെങ്കിലുമുണ്ടോ? എന്നിട്ടും നിഷേധികൾ തിന്മകളിൽ നിന്നും പിന്മാറുന്നില്ല. മറിച്ച് നിഷേധികൾ ധിക്കാരത്തിലും വെറുപ്പിലും കഴിയുകയാണ്. ചുരുക്കത്തിൽ വ്യാജ ദൈവങ്ങൾക്ക് എന്തെങ്കിലും ഉപകാരങ്ങളോ ഉപദ്രവങ്ങളോ ചെയ്യാൻ യാതൊരു കഴിവുമില്ല. എന്നിട്ടും അവയെ ആരാധിക്കുന്നത് വെറും വിഡ്ഢിത്തരമാണ്. ഇതെല്ലാം കേട്ടതിന്റെ അടിസ്ഥാനത്തിൽ ചിന്തിക്കുക. വഴി ശരിയാകാത്തതിനാൽ അപകടങ്ങളിൽ പെട്ട് മറിഞ്ഞുവീണ് മുഖം കുത്തി നടക്കുന്നവനാണോ? സന്മാർഗ്ഗത്തിലൂടെ നേരെ സഞ്ചരിക്കുന്നവനാണോ? സന്മാർഗ്ഗം പ്രാപിച്ചവൻ? സന്മാർഗ്ഗിയുടെയും നിഷേധിയുടെയും അവസ്ഥ ഇതുപോലെയാണ്. സത്യവിശ്വാസി പരസ്പര വിരുദ്ധമായ തീവ്രതകളിൽ നിന്നും അകന്നുമാറി നേരായ നിലയിൽ സന്മാർഗ്ഗത്തിലൂടെ സഞ്ചരിക്കുന്നു. നിഷേധിയുടെ മാർഗ്ഗം തന്നെ വഴികേടാണ്. സഞ്ചാരമാകട്ടെ, നാശകരമവുമാണ്. ഇത്തരം അവസ്ഥയിൽ എങ്ങനെ ലക്ഷ്യസ്ഥാനത്ത് എത്തിച്ചേരാനാണ്? കഴിഞ്ഞ ആയത്തുകളിൽ പ്രപഞ്ചവുമായി ബന്ധപ്പെട്ട ദൃഷ്ടാന്തങ്ങളായിരുന്നു. ഇനി മനുഷ്യ ശരീരവുമായി ബന്ധപ്പെട്ട ദൃഷ്ടാന്തങ്ങൾ വിവരിക്കുന്നു. പറയുക: അല്ലാഹു വലിയ കഴിവുള്ളവനും കാരുണിയവാനുമാണ്. അല്ലാഹുവാണ് നിങ്ങളെ പടച്ചത്. അവൻ തന്നെ നിങ്ങൾക്ക് കണ്ണും കാതും ഹൃദയവും നൽകി. പക്ഷേ നിങ്ങൾ കുറച്ച് മാത്രമേ നന്ദി കാണിക്കുന്നുള്ളൂ. താങ്കൾ ഇതും പറയുക: അവനാണ് നിങ്ങളെ ഭൂമിയിൽ പരത്തിയത്. അവനിലേക്കാണ് പരലോകത്ത് നിങ്ങൾ എല്ലാവരും ഒരുമിച്ചുകൂട്ടപ്പെടുന്നത്. നിങ്ങൾ സത്യസന്ധരാണെങ്കിൽ ഈ വാഗ്ദാനം എപ്പോഴാണ് പുലരുകയെന്ന് പരലോകത്തെക്കുറിച്ച് പറയപ്പെടുമ്പോൾ അവർ ചോദിക്കുന്നു. അവർക്ക് മറുപടിയായി പറയുക: അതിനെ നിജപ്പെടുത്തിക്കൊണ്ടുള്ള യഥാർത്ഥ അറിവ് അല്ലാഹുവിന് മാത്രമാണ്. ഞാൻ പൊതുവായ നിലയിൽ വളരെ വ്യക്തമായി മുന്നറിയിപ്പ് നൽകുന്നവൻ മാത്രമാണ്. അവരുടെ കർമ്മഫലമായി അല്ലാഹുവിന്റെ ശിക്ഷ അടുത്തു വന്നതായി കാണുപ്പെടുകയും വിചാരണയ്ക്ക് ശേഷം നരകത്തിൽ പോകാൻ കൽപ്പിക്കപ്പെടുകയും ചെയ്യുമ്പോൾ നിഷേധികളുടെ മുഖങ്ങൾ ദു:ഖം കാരണമായി വാടിപ്പോകുന്നതാണ്. അപ്പോൾ അവരോട് പറയപ്പെടും: ശിക്ഷ കൊണ്ടുവരികയെന്ന് നിങ്ങൾ ആവശ്യപ്പെടുകയും പരിഹാസ വാക്കുകളെല്ലാം പറയുകയും ചെയ്തിരുന്ന ശിക്ഷ ഇതുതന്നെയാണ്. അവരോട് പറയുക: നിങ്ങളുടെ ആഗ്രഹം പോലെ അല്ലാഹു എന്നെയും എന്റെ കൂട്ടുകാരെയും നശിപ്പിക്കുകയോ അല്ലെങ്കിൽ പടച്ചവന്റെ വാഗ്ദാനവും ഞങ്ങളുടെ പ്രതിക്ഷയും അനുസരിച്ച് ഞങ്ങളോട് കരുണകാണിക്കുകയോ ചെയ്തുവെന്നിരിക്കട്ടെ, രണ്ടവസ്ഥയിലും നിങ്ങൾ നിങ്ങളെക്കുറിച്ച് ചിന്തിക്കുകയാണ് വേണ്ടത്. എന്നാൽ നിഷേധികളെ വേദനാജനകമായ ശിക്ഷയിൽ നിന്നും ആരായിരിക്കും രക്ഷപ്പെടുത്തുക എന്ന് ചിന്തിക്കുക. അതായത് ഏതവസ്ഥയിലും ഞങ്ങളുടെ അന്ത്യം സുന്ദരമായിരിക്കും. പക്ഷേ, നിങ്ങളിലേക്ക് വരുന്ന അതിഭയങ്കര നാശത്തിൽ നിന്നും നിങ്ങളെ ആരായിരിക്കും രക്ഷിക്കുന്നതെന്ന് നിങ്ങൾ ചിന്തിക്കുക. ഇഹലോകത്ത് നമുക്കെന്തെങ്കിലും നാശനഷ്ടങ്ങൾ ഉണ്ടായാൽ തന്നെ നിങ്ങൾക്കുണ്ടാകാനിരിക്കുന്ന ഭയങ്കര നാശങ്ങൾ ഒരിക്കലും മാറുന്നതല്ല. ആകയാൽ നിങ്ങളെപ്പറ്റി ചിന്തിക്കാതെ ഞങ്ങളുടെ ഭാവിയെപ്പറ്റി ചിന്തിക്കുന്നതിൽ യാതൊരു അർത്ഥവുമില്ല. താങ്കൾ അവരോട് ഇപ്രകാരവും പറയുക: അല്ലാഹു എല്ലാവരോടും കരുണയുള്ളവനാണ്. അവന്റെ കൽപ്പന പ്രകാരം ഞങ്ങൾ അവനിൽ വിശ്വസിച്ചിരിക്കുന്നു, അവന്റെ മേൽ ഭരമേൽപ്പിക്കുകയം ചെയ്തിരിക്കുന്നു. സത്യവിശ്വാസം കാരണം ഞങ്ങളെ പരലോകത്ത് കാത്ത് രക്ഷിക്കുന്നതാണ്. ഭരമേൽപ്പിച്ചത് കാരണം ഭൗതിക നാശങ്ങൾ ദൂരീകരിക്കുകയോ എളുപ്പമാക്കുകയോ ചെയ്യുന്നതാണ്. ആകയാൽ നിങ്ങളുടെ മേൽ വേദനാജനകമായ ശിക്ഷ ഉണ്ടാവുകയും ഞങ്ങൾ അതിൽ നിന്നും സുരക്ഷിതരാവുകയും ചെയ്യുമ്പോൾ, ആരാണ് വ്യക്തമായ വഴികേടിൽ എന്ന് പിന്നീട് നിങ്ങൾ മനസ്സിലാക്കുന്നതാണ്. അത് നിങ്ങൾ തന്നെയായിരിക്കും. അവരുടെ വ്യാജ ദൈവങ്ങൾ അവരെ രക്ഷിക്കുമെന്ന് അവർക്ക് വിചാരമുണ്ടെങ്കിൽ പ്രസ്തുത വിചാരത്തിന്റെ അർത്ഥ ശൂന്യത മനസ്സിലാക്കിക്കൊടുക്കുന്നതിന് താങ്കൾ അവരോട് ചോദിക്കുക: നിങ്ങളുടെ കിണറുകളിലും മറ്റുമുള്ള വെള്ളം താഴേക്കിറങ്ങി വറ്റിപ്പോയാൽ നിങ്ങൾക്ക് ശുദ്ധജലം കൊണ്ടുതരുന്നത് ആരാണ്? ഉറവകൾ സജീവമാക്കി താഴ്ഭാഗത്ത് നിന്നും മുകളിലേക്ക് വെള്ളം കൊണ്ടുതരുന്നത് ആരാണ്? തീർച്ചയായും വെള്ളത്തെ ഇല്ലാതാക്കാനും കൊണ്ടുവരാനും കഴിവുള്ളവൻ അല്ലാഹു മാത്രമാണ്. അല്ലാഹുവിനെതിരിൽ ഇത് രണ്ടും ചെയ്യാൻ ആർക്കും കഴിവില്ല. ഇപ്രകാരമുള്ള പ്രകൃതിപരമായ കാര്യങ്ങളിൽ പോലും കൈ കടത്താൻ ആർക്കും കഴിവില്ലെങ്കിൽ പരലോക ശിക്ഷയിൽ നിന്നും ആർക്കെങ്കിലും നിങ്ങളെ രക്ഷിക്കാൻ കഴിയുമോ?
🔹🔹🔹🔹🔹
മആരിഫുല് ഹദീസ്
ഉസ്മാൻ ദുന്നൂറൈൻ (റ)ൻ്റെ മഹത്വങ്ങൾ
✍️ മൗലാനാ മുഹമ്മദ് മന്സൂര് നുഅ്മാനി
167. സുമാമ (റ) വിവരിക്കുന്നു: ഞാൻ ഉസ്മാൻ (റ)നെ തൻ്റെ വീടിൻ്റെ കോലായിയിൽ നിന്നും തന്നെ ഉപരോധിക്കുന്നവരെ അഭിസംബോധന ചെയ്തു കൊണ്ട് ഇപ്രകാരം പറയുന്നതായി കണ്ടു: ഞാൻ അല്ലാഹുവിനെയും ഇസ്ലാമിനെയും മുൻ നിർത്തി നിങ്ങളോട് ചോദിക്കുന്നു: റസൂലുല്ലാഹി ﷺ പലായനം ചെയ്ത് മദീനയിൽ വന്നപ്പോൾ ബിഅ്ർ റൂമയല്ലാതെ ശുദ്ധജലം ലഭിക്കുന്ന ഒരു കിണറും ഇല്ലായിരുന്നു. അതൊരു യഹൂദിയുടേതായിരുന്നു. അദ്ദേഹം വെള്ളത്തിന് ഇഷ്ടമുള്ള വലിയ ചോദിച്ചിരുന്നു. ഒരിക്കൽ റസൂലുല്ലാഹി ﷺ ചോദിച്ചു: ബിഅ്ർ റൂമ വാങ്ങിച്ച് എല്ലാ സഹോദരങ്ങൾക്കും വെള്ളമെടുക്കാൻ അനുവാദം കൊടുക്കുന്നത് ആരാണ്? അതിനുപകരം അല്ലാഹു സ്വർഗ്ഗത്തിൽ ഉന്നത ഭവനം നൽകുന്നതാണ്. ഞാൻ സ്വന്തം പൈസ കൊണ്ട് അത് വാങ്ങുകയും വഖ്ഫ് നടത്തുകയും ചെയ്തു. ഇന്ന് അതിൽ നിന്നും വെള്ളം കുടിക്കാൻ നിങ്ങൾ എന്നെ തടയുന്നു. തൽഫലമായി സമുദ്രത്തിലെ ഉപ്പുവെള്ളം കുടിക്കാൻ ഞാൻ നിർബന്ധിതനാണ്. ഈ സംഭവം നിങ്ങൾക്കറിയാമോ? ജനങ്ങൾ പറഞ്ഞു: അല്ലാഹുവേ! ഉസ്മാൻ പറയുന്ന ഈ കാര്യം സത്യമാണെന്ന് ഞങ്ങൾക്കറിയാം.
തുടർന്ന് ഉസ്മാൻ (റ) പറഞ്ഞു: അല്ലാഹുവിനെയും ഇസ്ലാമിനെയും മുൻ നിർത്തി ഞാൻ നിങ്ങളോട് ചോദിക്കുന്നു: റസൂലുല്ലാഹി ﷺ നിർമ്മിച്ച മസ്ജിദിൽ നമസ്കാരക്കാർ കാരണം ഞെരുക്കമുണ്ടായപ്പോൾ റസൂലുല്ലാഹി ﷺ ഒരിക്കൽ ചോദിച്ചു: ഇന്ന വീട്ടുകാരുടെ ഭൂമി വാങ്ങി, നമ്മുടെ മസ്ജിദിൽ ഉൾപ്പെടുത്താൻ ആരാണുള്ളത്? അതിനുപകരം സ്വർഗ്ഗത്തിൽ അല്ലാഹു ഉന്നത ഭൂമി അദ്ദേഹത്തിന്റെ നൽകുന്നതാണ്. അപ്പോൾ എൻ്റെ സ്വന്തം സമ്പത്ത് കൊണ്ട് ഞാനത് വാങ്ങി മസ്ജിദിൽ പെടുത്തി. ഇന്ന് നിങ്ങൾ അവിടെ രണ്ട് റക്അത്ത് നമസ്കരിക്കുന്നതിൽ എന്നെ തടയുകയാണ്! ഇക്കാര്യം നിങ്ങൾക്കറിവുള്ളതല്ലേ? ജനങ്ങൾ പറഞ്ഞു: അല്ലാഹുവേ, ഞങ്ങൾ ഇതും അറിയുന്നവരാണ്.
ശേഷം ഉസ്മാൻ (റ) പറഞ്ഞു: ഒരിക്കൽ റസൂലുല്ലാഹി ﷺ മക്കയിലെ സബീർ പർവ്വതത്തിൽ നിൽക്കുകയായിരുന്നു. റസൂലുല്ലാഹി ﷺ യോടൊപ്പം അബൂബക്ർ, ഉമർ ഇരുവരും ഉണ്ടായിരുന്നു. തദവസരം പർവതം കുലുങ്ങി മുകളിലെ കല്ലുകൾ താഴേക്ക് വീണു. റസൂലുല്ലാഹി ﷺ പാദം ശക്തമായി ചവിട്ടിക്കൊണ്ട് സബീറേ, സമാധാനപ്പെടുക. ഇപ്പോൾ നിന്റെ മേൽ ഒരു പ്രവാചകനും ഒരു സിദ്ദീഖും രണ്ട് ശഹീദുകളുമാണ് ഉള്ളതെന്ന് പറഞ്ഞു. ഇക്കാര്യം നിങ്ങൾക്കറിയാമോ? അവർ പറഞ്ഞു: അല്ലാഹുവേ, ഇതും ഞങ്ങൾക്കറിയാം!
തദവസരം ഉസ്മാൻ (റ) പറഞ്ഞു: അല്ലാഹു അക്ബർ, ഇവരും സാക്ഷ്യം വഹിച്ചിരിക്കുന്നു. കഅ്ബയുടെ രക്ഷിതാവാണേ സത്യം ഞാൻ ശഹാദത്ത് വരിക്കുന്നവനാകുന്നു. ഈ വാചകം ഉസ്മാൻ (റ) മൂന്നു പ്രാവശ്യം പറഞ്ഞു. (തിർമിദി, നസാഈ, ദാറുഖുത്നി)
വിവരണം: ഉമറുൽ ഫാറൂഖ് (റ)ൻ്റെ ശഹാദത്തിനുശേഷം ഖലീഫയെ തിരഞ്ഞെടുക്കുന്നതിന് നിയമിക്കപ്പെട്ട കൂടിയാലോചനാ സമിതി ഉസ്മാൻ (റ)നെ ഖലീഫയായി തിരഞ്ഞെടുത്തു. അബൂബക്ർ, ഉമർ (റ) ഇരുവരെയും ഖലീഫയായി അംഗീകരിച്ചത് പോലെ ഇക്കാര്യം മുഹാജിറുകളും അൻസാറുകളുമായ എല്ലാ സ്വഹാബികളും അംഗീകരിച്ചു. തുടർന്ന് ഉസ്മാൻ (റ) പന്ത്രണ്ട് വർഷം ഖലീഫയായി നിലകൊണ്ടു. ഇതിൽ അവസാനത്തെ വർഷങ്ങളിൽ റസൂലുല്ലാഹി ﷺ പല ഘട്ടങ്ങളിലായി പ്രവചിച്ച പ്രശ്നങ്ങൾ ഉടലെടുത്തു. ഈ ഹദീസിൽ പറയപ്പെട്ടിരിക്കുന്ന ഉപരോധം ഇതിൽ അവസാനത്തെ സംഭവമാണ്. ഈജിപ്ത്, ഇറാഖ് മുതലായ ചില പട്ടണങ്ങളിൽ നിന്നുമുള്ള പ്രശ്നക്കാരാണ് ഇതിനു മുന്നിട്ടിറങ്ങിയത്. ഇതിൻ്റെ പിന്നിൽ ഗൂഢാലോചന നടത്തിയത് യഹൂദിയായിരുന്ന അബ്ദുല്ലാഹിബ്നു സബഅ് എന്ന വ്യക്തിയായിരുന്നു. ഈ അക്രമകാരികൾ ഉപരോധം കഠിനമാക്കി. എന്തിനേറെ, ഹസ്രത്ത് ഉസ്മാൻ (റ)ന് മസ്ജിദിൽ പോയി നമസ്കരിക്കാനോ വീട്ടിൽ വെള്ളം എത്തിക്കാനോ പോലും സമ്മതിച്ചിരുന്നില്ല. ഉസ്മാൻ (റ) ഖിലാഫത്തിൽ നിന്നും പിന്മാറണം എന്നതായിരുന്നു അവരുടെ ആവശ്യം. എന്നാൽ, അടുത്ത് തന്നെ ഒരു ഹദീസിൽ വിവരിക്കപ്പെടുന്ന റസൂലുല്ലാഹി ﷺയുടെ ശക്തമായ ഉൽബോധനം കാരണം, ഉസ്മാൻ (റ) അതിന് തയ്യാറായില്ല. അവസാനം, അക്രമികളുടെ കരങ്ങളാൽ അങ്ങേയറ്റം മർദ്ദിതനായി രക്തസാക്ഷിത്വം വഹിച്ചു.
ഉസ്മാൻ (റ) ലോകത്തെ ഒരു വലുതും ശക്തവുമായ ഭരണമാണ് നടത്തിയിരുന്നത്. അക്രമികൾക്ക് എതിരിൽ ശക്തി ഉപയോഗിക്കാൻ തീരുമാനിച്ചിരുന്നെങ്കിൽ കുറഞ്ഞപക്ഷം അതിന് അനുമതി ചോദിച്ചവർക്ക് അനുവാദം കൊടുത്തിരുന്നെങ്കിൽ ഈ അക്രമങ്ങൾ പൂർണ്ണമായും അമർച്ച ചെയ്യാൻ കഴിയുമായിരുന്നു. എന്നാൽ, പ്രകൃതിപരമായ പരിശുദ്ധിയുടെയും ലജ്ജയുടെയും പ്രേരണ കാരണം തൻ്റെ ജീവൻ്റെ രക്ഷയ്ക്കുവേണ്ടി, കലിമ ചൊല്ലിയ സഹോദരങ്ങളുടെ രക്തം ഭൂമിയിൽ വീഴാൻ അദ്ദേഹം അനുവദിച്ചില്ല. അവസാനം വരെ അവർക്ക് കാര്യം മനസ്സിലാക്കി കൊടുക്കാൻ പരിശ്രമിക്കുകയുണ്ടായി. അതിൽ ചില കാര്യങ്ങളാണ് ഈ ഹദീസിൽ പറയപ്പെട്ടിരിക്കുന്നത്. ഹദീസിൻ്റെ അവസാനത്തിൽ കഅ്ബയുടെ രക്ഷിതാവിനാണേ സത്യം ഞാൻ ശഹീദാകുന്നതാണെന്ന് ഉസ്മാൻ (റ) മൂന്ന് പ്രാവശ്യം പറഞ്ഞത് ശ്രദ്ധേയമാണ്. അതെ, അല്ലാഹു കനിഞ്ഞരുളിയ ഈമാനിക ഉൾക്കാഴ്ച്ചയും ചില അദൃശ്യ സൂചനകളും മുന്നിൽ വെച്ചുകൊണ്ട് ഈ പ്രശ്നങ്ങളുടെ പേരിൽ ശഹാദത്ത് വരിക്കുമെന്ന് ഉസ്മാൻ (റ) മനസ്സിലാക്കിയിരുന്നു. ഇക്കാര്യം റസൂലുല്ലാഹി ﷺ വിവിധ സന്ദർഭങ്ങളിൽ സൂചിപ്പിക്കുകയും ചെയ്തിരുന്നു. അതിലൊന്ന് ഈ ഹദീസിന്റെ അവസാനത്തിൽ പറഞ്ഞ സംഭവമാണ്. ഈ സംഭവം സബീർ പർവ്വതത്തിൽ ആണെന്ന് ഹദീസിൽ വന്നിരിക്കുന്നു. എന്നാൽ അടുത്ത ഹദീസിൽ വന്നിരിക്കുന്നത് ഉഹ്ദ് മലയാണെന്ന്. അത് മറ്റൊരു സംഭവമാണ്.
🔹🔹🔹🔹🔹
ഇലാ റഹ്മത്തില്ലാഹ്...
അമീറേ ശരീഅത്ത് കർണാടക:
മൗലാനാ മുഫ്തി സഗീർ അഹ്മദ് റഷാദി;
അല്ലാഹുവിൻ്റെ റഹ്മത്തിലേക്ക് യാത്രയായി.
✍️ ഹാഫിസ് അബ്ദുശ്ശകൂർ ഖാസിമി
ദക്ഷിണേന്ത്യയിലെ ഒരു പ്രധാനപ്പെട്ട ഇസ്ലാമിക വൈജ്ഞാനിക പ്രബോധന വ്യക്തിത്വമാണ് ബഡേ ഹസ്രത്ത് എന്ന പേരിൽ അറിയപ്പെടുന്ന മൗലാനാ അബുസ്സഊദ് അഹ്മദ് ഫാദിൽ ബാഖവി മർഹൂം. ധാരാളം നന്മകൾ നിറഞ്ഞ മൗലാന മർഹൂമിൻ്റെ ഒരു പ്രധാന സേവനമാണ് ഉത്തമരായ പിൻഗാമികളെ വാർത്തെടുക്കുക എന്നത്. തൽഫലമായി ദാറുൽ ഉലൂം സബീലുർ റഷാദിനെ പോലുള്ള സ്ഥാപനങ്ങളും മൗലാനാ മുഫ്തി അഷ്റഫ് അലി ഹസ്രത്തിനെ പോലുള്ള ഉത്തമ വ്യക്തിത്വങ്ങളും ഉണ്ടായിത്തീർന്നു. ഈ വഴിയിൽ പ്രത്യേകം സ്മരണീയനായ ഒരു വ്യക്തിത്വമാണ് ഇന്ന് അല്ലാഹുവിൻ്റെ കാരുണ്യത്തിലേക്ക് യാത്രയായ മൗലാനാ മുഫ്തി സഗീർ അഹമ്മദ് റഷാദി മർഹൂം. ഈ മഹത്തുക്കൾ ദാറുൽ ഉലൂം സബീലുർ റഷാദിനെയും അതുമായി ബന്ധപ്പെട്ട എല്ലാ പ്രവർത്തനങ്ങളെയും വിശിഷ്യ ഓൾ ഇന്ത്യ മുസ്ലിം പേഴ്സണൽ ലോ ബോർഡിൻ്റെ പ്രവർത്തനങ്ങളെയും വളരെ നല്ല നിലയിൽ മുന്നോട്ടു നീക്കുകയുണ്ടായി.
കഴിഞ്ഞ വർഷം ബാംഗ്ലൂർ സബീലുർ റഷാദിൽ ഓൾ ഇന്ത്യ മുസ്ലിം പേഴ്സണൽ ലോ ബോർഡിൻ്റെ അഖിലേന്ത്യാ സമ്മേളനം നടത്താൻ തീരുമാനിച്ചപ്പോൾ, മഹാൻമാരായ മുൻഗാമികൾ യാത്രയായ സന്ദർഭത്തിൽ പ്രത്യേകിച്ച് വലിയ അനാരോഗ്യത്തിൽ കഴിയുന്ന മൗലാനാ മർഹൂമിൻ്റെ നേതൃത്വത്തിൽ യോഗം എങ്ങനെയായിരിക്കും എന്ന ആശങ്ക ഉയർന്നിരുന്നു. എന്നാൽ മറുപടി പ്രസംഗം നടത്തിയ മൗലാനാ മർഹൂം വളരെ പതുങ്ങിയ ശബ്ദത്തിൽ പറഞ്ഞു: ഓൾ ഇന്ത്യ മുസ്ലിം പേഴ്സണൽ ലോ ബോർഡിൻ്റെ പഴയ കേന്ദ്രം കൂടിയായ സബീലുർ റഷാദിലേക്ക് എല്ലാ സഹോദരങ്ങളെയും അങ്ങേയറ്റം സ്നേഹത്തോടെ ക്ഷണിക്കുന്നു. പടച്ചവൻ്റെ അനുഗ്രഹത്താൽ പഴയ മഹാത്മാക്കളുടെ രീതിയിൽ തന്നെ ബോർഡിൻ്റെ സമ്മേളനം സബീലുർ റഷാദിൽ നല്ല നിലയിൽ നടക്കുന്നതാണ് ഇൻഷാ അല്ലാഹ്. മാസങ്ങൾ കഴിഞ്ഞ് സമ്മേളനത്തിന് സബീലുർ റഷാദിൽ എത്തിയപ്പോൾ വലിയ സന്തോഷവും സമാധാനവും ഉണ്ടായി. സബീലുർ റഷാദിൻ്റെ പുറത്തുള്ള മെട്രോ വർക്കുകൾ നടക്കുന്ന ഒരു മാറ്റം ഒഴിച്ചാൽ സബീലുർ റഷാദ് മുഴുവനും പഴയ ശൈലിയിൽ തന്നെ ഉസ്താദുമാരെയും മുതഅല്ലിമീങ്ങളെയും കൊണ്ട് നിറഞ്ഞിരിക്കുന്നു. അവരുടെ വേഷവിധാനങ്ങൾ പോലും പഴയ മഹാത്മാക്കളുടെ അതേ ശൈലിയിൽ തന്നെയാണ്.
സ്വാഗതപ്രസംഗം മൗലാനാ മർഹൂമിന് ശബ്ദമില്ലാത്തതിനാൽ എഴുതിയത് അവിടുത്തെ ഒരു ഉസ്താദ് വായിച്ചു. സത്യം പറയുന്നു: അത് മൗലാനാ അഷ്റഫ് അലി ഹസ്രത്ത് മർഹൂമിൻ്റെ സ്വാഗതപ്രസംഗം പോലെ തന്നെ സാഹിത്യപരമായ ശൈലി അടങ്ങിയതായിരുന്നു. പരിപാടി മുഴുവനും അതിഗംഭീരമായി അനാരോഗ്യവാനായ മൗലാന മർഹൂം നല്ല നിലയിൽ നയിച്ചു. തീർത്തും അനാരോഗ്യവാനും ശബ്ദമില്ലാത്ത അവസ്ഥയിലുമായിരുന്നിട്ടും പരിപാടി മുഴുവനും രണ്ടുപേരുടെ സഹായത്തോടെ കറങ്ങി നടന്ന് നടത്തുകയും അവസാനം അതിഗംഭീരമായ ഒരു സമ്മേളനം നടത്തുകയും ചെയ്തു. സ്വാഗതപ്രസംഗത്തിലും പൊതുസമ്മേളനത്തിലെ സ്വാഗതപ്രസംഗം വളരെ ഗംഭീരമായിരുന്നു. പ്രത്യേകിച്ചും ഇസ്ലാമിക ശരീഅത്തിൻ്റെ വിഷയത്തിൽ ഒരു വിട്ടുവീഴ്ചയ്ക്കും തയ്യാറല്ല എന്ന വാചകം വളരെ അത്ഭുതകരമായിരുന്നു.
മൗലാനാ മർഹൂമിനെ വിനീതൻ കണ്ടപ്പോൾ പഴയ സ്മരണകൾ വലിയ ആവേശത്തോടെ വിവരിച്ചു. ജ്യേഷ്ഠസഹോദരൻ ഹാജി യഹ്യ സാഹിബ് മർഹൂമിനെ മാത്രമല്ല, ആദരണീയനായ മാമ മുഹമ്മദ് ഹാജി മർഹൂമിനെ പറ്റിയും സംസാരിച്ചു. കേരളത്തിലേക്ക് വരണമെന്നും ഇവിടെയുള്ള റഷാദികളായ സഹോദരങ്ങളെ കാണണമെന്നും ആഗ്രഹം പ്രകടിപ്പിച്ചു. റഷാദി സഹോദരങ്ങൾ പരിപാടി സംഘടിപ്പിച്ചതാണെങ്കിലും മൗലാനാ മർഹൂമിന് വരാൻ സാധിച്ചില്ല. അവസാനം ദാറുൽ ഉലൂം സബീലുർ റഷാദിനെയും തെന്നിന്ത്യയെയും ദുഃഖത്തിലാഴ്ത്തിക്കൊണ്ട് മൗലാനാ അവർകൾ അല്ലാഹുവിൻ്റെ കാരുണ്യത്തിലേക്ക് യാത്രയായി. ബഡേ ഹസ്രത്തിന് ശേഷം മുഫ്തി അഷ്റഫ് അലി ഹസ്രത്തിനെ കൊണ്ടും ഹസ്രത്തിന് ശേഷം മകൻ മൗലാന മുആദ് റഷാദിയെ കൊണ്ടും ശേഷം ബാഹ്യമായി ബലഹീനനും ആന്തരികമായി കരുത്തനുമായ മൗലാനാ സഗീർ മർഹൂമിനെ കൊണ്ടും കാര്യങ്ങൾ മുന്നോട്ട് നീക്കിയ പടച്ചവൻ ഉത്തമ പിൻഗാമിയെ കൊണ്ട് കാര്യങ്ങൾ മുന്നോട്ട് നീക്കുമെന്നതിൽ യാതൊരു സംശയവുമില്ല. അല്ലാഹു തആല മൗലാനാ മർഹൂമിന് പരിപൂർണ്ണ മഗ്ഫിറത്തും മർഹമത്തും നൽകുകയും ഉയർന്ന ദറജാത്തുകൾ നൽകി അനുഗ്രഹിക്കുകയും ചെയ്യട്ടെ!
🔹🔹🔹🔹🔹
വാർത്തകൾ
* രാജ്യത്തിൻ്റെ സ്വാതന്ത്ര്യ സമരത്തിലും മതേതര ഭരണഘടനാ നിർമ്മാണത്തിലും ജംഇയ്യത്ത് ഉലമാ ഏ ഹിന്ദ് നേതൃപരമായ പങ്ക് വഹിച്ചു.
* മഹാത്മാഗാന്ധിയുടെ വധത്തിന് ശേഷം വർഗീയതയുടെ തല അടിച്ചമർത്തിയിരുന്നെങ്കിൽ രാജ്യം നശിക്കില്ലായിരുന്നു.
* നമ്മുടെ പൂർവികർ കണ്ട സ്വപ്നമല്ല രാജ്യത്തെ ഇപ്പോഴത്തെ സാഹചര്യം. സ്വാതന്ത്ര്യം എന്താണെന്ന് ഞങ്ങളോട് ചോദിക്കൂ, ത്യാഗങ്ങൾ സഹിച്ചത് ഞങ്ങളാണ്.
🎙️ മൗലാനാ സയ്യിദ് അർഷദ് മദനി
കാര്യം അല്പം വിചിത്രമായി തോന്നാം, എന്നാൽ ഇതൊരു സത്യമാണ്. സ്വാതന്ത്ര്യത്തിന് ശേഷമുള്ള ഭരണകൂടങ്ങൾ തങ്ങളുടെ ഭരണകാലത്ത് മതത്തിൻ്റെ പേരിലുള്ള വെറുപ്പിന്റെ രാഷ്ട്രീയത്തോട് സ്വീകരിച്ച അയഞ്ഞ സമീപനം രാജ്യത്തിനും ഭരണഘടനയ്ക്കും കനത്ത നാശമാണ് വരുത്തിവെച്ചത്. ഇന്ന്, സ്വാതന്ത്ര്യം ലഭിച്ച് 77 വർഷങ്ങൾക്ക് ശേഷം, ഭരണഘടനയും ജനാധിപത്യ മൂല്യങ്ങളും പരസ്യമായി ഇല്ലാതാക്കപ്പെട്ടു കൊണ്ടിരിക്കുന്ന രീതി, സ്വാതന്ത്ര്യസമര കാലത്തെ നമ്മുടെ നേതാക്കൾ പോലും ചിന്തിച്ചിട്ടുണ്ടാകില്ല. സ്വതന്ത്ര ഇന്ത്യയുടെ ഭരണഘടനയ്ക്ക് അടിത്തറയിട്ട അതേ പാതയിൽ പൂർണ്ണ സത്യസന്ധതയോടെ ഭരണഘടന നടപ്പിലാക്കിയിരുന്നെങ്കിൽ, ഇന്ന് നമുക്ക് ഈ ദുരിതദിനങ്ങൾ കാണേണ്ടി വരുമായിരുന്നില്ല. ഇത് ഞങ്ങൾ വെറുതെ പറയുന്നതല്ല, ചരിത്രപരമായി ഇതൊരു ഖേദകരമായ സത്യമാണ്.
കോൺഗ്രസ് നേതാക്കൾ എന്ത് ഭയം കൊണ്ടാണ് ആദ്യദിനം മുതൽ മതത്തിൻ്റെ പേരിലുള്ള വെറുപ്പിന്റെ രാഷ്ട്രീയത്തെ എതിർക്കുന്നതിൽ അയഞ്ഞ സമീപനം സ്വീകരിച്ചതെന്ന് അറിയില്ല. വർഗീയ ശക്തികളോട് മൃദുസമീപനം സ്വീകരിച്ചു. ഭരണഘടനയ്ക്കും നിയമത്തിനും അനുസൃതമായി അവർക്കെതിരെ കർശന നിയമനടപടി സ്വീകരിക്കുന്നതിൽ നിന്ന് ഒഴിഞ്ഞുമാറി. ഇതിൻ്റെ ഫലമായി വർഗീയ ശക്തികൾക്ക് തഴച്ചുവളരാൻ അവസരം ലഭിച്ചു. മഹാത്മാഗാന്ധിയുടെ വധത്തിന് പിന്നിൽ വർഗീയ ശക്തികളുടെ കരങ്ങളുണ്ടായിരുന്നു. അന്ന് തന്നെ വർഗീയതയുടെ തല അടിച്ചമർത്തിയിരുന്നെങ്കിൽ രാജ്യത്തെ നാശത്തിൽ നിന്ന് രക്ഷിക്കാമായിരുന്നു.
വിഭജനത്തിന് ശേഷം രാജ്യത്തുടനീളം മുസ്ലീം വിരുദ്ധ കലാപങ്ങൾ തുടങ്ങിയപ്പോൾ അവ തടയാൻ മഹാത്മാഗാന്ധി നിരാഹാരമനുഷ്ഠിച്ചു. വർഗീയ ശക്തികൾക്കും, കോൺഗ്രസിലെ തന്നെ ചില മുതിർന്ന നേതാക്കൾക്കും ഇത് ഇഷ്ടപ്പെട്ടില്ല. അവർ അദ്ദേഹത്തിന് എതിരായി. ഒടുവിൽ അദ്ദേഹം വധിക്കപ്പെട്ടു. ഞങ്ങളുടെ കാഴ്ചപ്പാടിൽ മഹാത്മാഗാന്ധിയെപ്പോലൊരു മഹത്തായ വ്യക്തിത്വത്തിൻ്റെ കൊലപാതകം രാജ്യത്തെ മതേതരത്വത്തിൻ്റെ കൊലപാതകമായിരുന്നു. എന്നാൽ ഖേദകരമെന്ന് പറയട്ടെ, ആ സമയത്ത് കോൺഗ്രസ് നേതൃത്വം ചെയ്യേണ്ടിയിരുന്നത് ചെയ്തില്ല. വർഗീയതയുടെ ഈ ഭ്രാന്ത് അവസാനിപ്പിക്കണമെന്ന് ജംഇയ്യത്ത് ഉലമാ ഏ ഹിന്ദ് നേതൃത്വം കോൺഗ്രസ് നേതൃത്വത്തോട് നിരന്തരം ആവശ്യപ്പെട്ടിരുന്നു. എന്നാൽ ഈ ആവശ്യത്തിന് വേണ്ടത്ര ഗൗരവം നൽകപ്പെട്ടില്ല, ഇത് വർഗീയവാദികൾക്ക് പ്രോത്സാഹനമായി.
സ്വാതന്ത്ര്യത്തിന് മുമ്പ് തന്നെ ജംഇയ്യത്ത് ഉലമാ ഏ ഹിന്ദിൻ്റെ നേതാക്കൾ കോൺഗ്രസ് നേതാക്കളിൽ നിന്ന് രേഖാമൂലം ഒരു ഉറപ്പ് വാങ്ങിയിരുന്നു എന്നത് ഇന്നത്തെ തലമുറയ്ക്ക് അറിയില്ല. സ്വാതന്ത്ര്യത്തിന് ശേഷം രാജ്യത്തിൻ്റെ ഭരണഘടന മതേതരമായിരിക്കുമെന്നും, അതിൽ എല്ലാ മതന്യൂനപക്ഷങ്ങൾക്കും പൂർണ്ണ മതസ്വാതന്ത്ര്യം ഉണ്ടായിരിക്കുമെന്നുമായിരുന്നു ആ ഉറപ്പ്. എന്നാൽ സ്വാതന്ത്ര്യത്തിന് ശേഷം രാജ്യം വിഭജിക്കപ്പെട്ടപ്പോൾ, മുസ്ലീങ്ങൾക്ക് വേണ്ടി മതത്തിൻ്റെ പേരിൽ ഒരു പുതിയ രാജ്യം ഉണ്ടായ സ്ഥിതിക്ക് നമ്മുടെ രാജ്യത്തിൻ്റെ ഭരണഘടന മതേതരമാവേണ്ടതില്ല എന്ന് വാദിച്ച മറ്റ് നേതാക്കളുടെ ആവശ്യത്തോടൊപ്പം കോൺഗ്രസ് നേതാക്കളിലെ ഒരു വലിയ വിഭാഗവും ചേർന്നു.
ഈ അവസരത്തിൽ ജംഇയ്യത്ത് ഉലമാ ഏ ഹിന്ദിൻ്റെ നേതൃത്വം കോൺഗ്രസ് നേതാക്കളുടെ കൈപിടിച്ച് അവരോട് പറഞ്ഞു: "രാജ്യം വിഭജിക്കപ്പെട്ടുവെങ്കിൽ അതിൻ്റെ കരടരേഖയിൽ ഒപ്പുവെച്ചത് ഞങ്ങളല്ല, നിങ്ങളാണ്. അതിനാൽ നിങ്ങൾ നിങ്ങളുടെ വാഗ്ദാനം നിറവേറ്റുക." അങ്ങനെ ഒരു മതേതര ഭരണഘടന തയ്യാറായി. എന്നാൽ വർഗീയതയുടെ വേരുകൾ ഉള്ളിൽ ആഴത്തിൽ പടർന്നുകൊണ്ടിരുന്നു. ജംഇയ്യത്ത് ഉലമാ ഏ ഹിന്ദിൻ്റെ നിരന്തരമായ നിർബന്ധത്തിന് ശേഷവും അതിന് കടിഞ്ഞാണിട്ടില്ല. അന്ന് കേന്ദ്രത്തിലും എല്ലാ സംസ്ഥാനങ്ങളിലും കോൺഗ്രസ് തന്നെയായിരുന്നു ഭരണത്തിൽ. അവർ വിചാരിച്ചിരുന്നെങ്കിൽ ഇതിനെതിരെ കർശന നിയമനിർമ്മാണം നടത്താമായിരുന്നു. എന്നാൽ അവർ സ്വീകരിച്ച അയഞ്ഞ സമീപനത്തിൻ്റെ ഫലമായി വർഗീയ ശക്തികൾ കൂടുതൽ കരുത്താർജ്ജിച്ചു. വർഗീയതയ്ക്കെതിരെ കോൺഗ്രസ് ഇപ്പോൾ സ്വീകരിച്ചിരിക്കുന്ന കർശന നിലപാട് 77 വർഷം മുമ്പ് സ്വീകരിച്ചിരുന്നെങ്കിൽ അവർക്ക് അധികാരം നഷ്ടപ്പെടില്ലായിരുന്നു, രാജ്യം നാശത്തിൻ്റെ വക്കിലെത്തുകയുമില്ലായിരുന്നു.
രാജ്യത്തിൻ്റെ സ്വാതന്ത്ര്യത്തിന് വേണ്ടി ത്യാഗം സഹിച്ച നമ്മുടെ പൂർവികർ സ്വപ്നം കണ്ട ഇന്ത്യ ഇതല്ല. വംശം, ജാതി, മതം എന്നിവയ്ക്കതീതമായി എല്ലാവർക്കും സമാധാനത്തോടെയും ഐക്യത്തോടെയും ജീവിക്കാൻ കഴിയുന്ന ഒരു ഇന്ത്യയാണ് നമ്മുടെ പൂർവികർ സ്വപ്നം കണ്ടത്. സ്വാതന്ത്ര്യം മാത്രമല്ല, രാജ്യത്തിൻ്റെ ചരിത്രവും ഇന്ത്യയിലെ പണ്ഡിതന്മാരെ പരാമർശിക്കാതെ പൂർത്തിയാകില്ല. ഇന്ത്യയിലെ സ്വാതന്ത്ര്യ സമരത്തിന് തുടക്കം കുറിച്ചത് ഉലമാക്കളും മുസ്ലിംകളുമാണ്. ആരും ചിന്തിക്കുക പോലും ചെയ്യാതിരുന്ന കാലത്ത് ജനങ്ങളെ അടിമത്തത്തെക്കുറിച്ച് ബോധവാന്മാരാക്കിയത് അവരാണ്.
ഇന്ത്യയിൽ ബ്രിട്ടീഷുകാർക്കെതിരെ ആദ്യമായി കലാപക്കൊടി ഉയർത്തിയത് ഇന്ത്യയിലെ ഏറ്റവും വലിയ പണ്ഡിതനായ ഷാഹ് അബ്ദുൽ അസീസ് ദഹ്ലവി (റ) തൻ്റെ മദ്രസയിൽ നിന്നാണ്. മറ്റുള്ളവർ ഉറങ്ങിക്കിടക്കുമ്പോൾ നമ്മുടെ പൂർവികരും പണ്ഡിതന്മാരും മാതൃരാജ്യത്തിൻ്റെ സ്വാതന്ത്ര്യത്തിനായുള്ള കാഹളം മുഴക്കി. രാജ്യത്തിൻ്റെ യഥാർത്ഥ ചരിത്രത്തിൽ നിന്ന് മനഃപൂർവം കണ്ണടയ്ക്കുന്നവരോട് ഞങ്ങൾ പറയാൻ ആഗ്രഹിക്കുന്നു: ക്രൂരരായ ബ്രിട്ടീഷ് ഭരണാധികാരികൾക്കെതിരെ പോരാടി കാബൂളിൽ ഒരു പ്രവാസ ഇന്ത്യൻ സർക്കാർ സ്ഥാപിച്ചത് നമ്മുടെ പൂർവികരാണ്. ആ സർക്കാരിൻ്റെ പ്രസിഡന്റായി ഒരു ഹിന്ദു രാജാവായ മഹേന്ദ്ര പ്രതാപ് സിംഗിനെയാണ് നിയമിച്ചത്. കാരണം, നമ്മുടെ പൂർവികർ മതത്തിന് അതീതമായി ഐക്യത്തിൻ്റെയും മനുഷ്യത്വത്തിൻ്റെയും അടിസ്ഥാനത്തിൽ ഈ രാജ്യത്തെ അടിമത്തത്തിൻ്റെ ചങ്ങലകളിൽ നിന്ന് മോചിപ്പിക്കാൻ ആഗ്രഹിച്ചു.
ഹിന്ദുക്കളെയും സിഖുകാരെയും മുസ്ലിംകളെയും യോജിപ്പിക്കാതെ ഈ സ്വപ്നം സാക്ഷാത്കരിക്കാനാവില്ലെന്ന് അവർക്ക് നന്നായി അറിയാമായിരുന്നു. അതിനാൽ, ശൈഖുൽ ഹിന്ദ് മാൾട്ട ജയിലിൽ നിന്ന് മോചിതനായി വന്നപ്പോൾ അദ്ദേഹം ഊന്നിപ്പറഞ്ഞു: "രാജ്യത്തിൻ്റെ സ്വാതന്ത്ര്യ ദൗത്യം മുസ്ലിംകളുടെ മാത്രം ശ്രമം കൊണ്ട് പൂർത്തിയാകില്ല. ബ്രിട്ടീഷുകാരുടെ പിടിയിൽ നിന്ന് രാജ്യത്തെ മോചിപ്പിക്കണമെങ്കിൽ സ്വാതന്ത്ര്യ സമരത്തെ ഹിന്ദു-മുസ്ലിം ഐക്യ സമരമാക്കണം." ഭാഗ്യവശാൽ സിഖ് പോരാളികളും കൂടെ വന്നാൽ സ്വാതന്ത്ര്യത്തിലേക്കുള്ള വഴി കൂടുതൽ എളുപ്പമാകുമെന്നും അദ്ദേഹം പറഞ്ഞിരുന്നു. ഷൈഖുൽ ഹിന്ദിൻ്റെ ഈ വാക്കുകൾ പുസ്തകങ്ങളിൽ രേഖപ്പെടുത്തപ്പെട്ടിട്ടുണ്ട്. നമ്മുടെ പൂർവികർ ഹിന്ദു-മുസ്ലിം ഐക്യത്തിൻ്റെ പാതയിലൂടെ മുന്നോട്ട് പോയി രാജ്യത്തെ ബ്രിട്ടീഷ് അടിമത്തത്തിൽ നിന്ന് മോചിപ്പിച്ചു.
നിർഭാഗ്യവശാൽ രാജ്യം സ്വതന്ത്രമായതോടൊപ്പം വിഭജിക്കപ്പെടുകയും ചെയ്തു. ഈ വിഭജനം നാശത്തിനും തകർച്ചയ്ക്കും കാരണമായി. ഇത് ഏതെങ്കിലും ഒരു പ്രത്യേക വിഭാഗത്തിന് മാത്രമല്ല, ഹിന്ദുക്കൾക്കും മുസ്ലിംകൾക്കും എല്ലാവർക്കും നാശത്തിന് കാരണമായി. വിഭജനം നടക്കാതിരിക്കുകയും ഈ മൂന്ന് രാജ്യങ്ങളും ഒന്നായിരിക്കുകയും ചെയ്തിരുന്നെങ്കിൽ ഇന്നത്തെ ഈ സാഹചര്യം ഉണ്ടാവില്ലായിരുന്നു. ഈ ശക്തി ഒന്നായിരുന്നെങ്കിൽ ലോകത്തിലെ ഒരു ശക്തിക്കും നമ്മളെ കണ്ണുതുറന്ന് നോക്കാൻ ധൈര്യമുണ്ടാകുമായിരുന്നില്ല.
ഈ നീണ്ട സ്വാതന്ത്ര്യ സമരത്തിന് ശേഷം മതേതര ഭരണഘടനാ നിർമ്മാണത്തിൽ രാജ്യത്തെ സജീവമായ സംഘടനയായ ജംഇയ്യത്ത് ഉലമാ ഏ ഹിന്ദ് വഹിച്ച നേതൃപരമായ പങ്ക് എല്ലാ അർത്ഥത്തിലും ചരിത്രപരമാണ്.
അതുകൊണ്ടാണ് രാജ്യത്തിൻ്റെ സ്വാതന്ത്ര്യസാധ്യതകൾ തെളിഞ്ഞപ്പോൾ, നമ്മുടെ പണ്ഡിതന്മാർ അന്നത്തെ ഉന്നത നേതാക്കളായ മോത്തിലാൽ നെഹ്റു, മഹാത്മാഗാന്ധി, ജവഹർലാൽ നെഹ്റു തുടങ്ങിയവരിൽ നിന്ന്, സ്വാതന്ത്ര്യത്തിന് ശേഷം രാജ്യത്തിൻ്റെ ഭരണഘടന മതേതരമായിരിക്കുമെന്ന് ഉറപ്പ് വാങ്ങിക്കൊണ്ടിരുന്നത്. മുസ്ലീങ്ങളുടെ പള്ളികൾ, മദ്റസകൾ, ഇമാംബാറകൾ, ഖബറിസ്ഥാനുകൾ, ഭാഷ, സംസ്കാരം, പാരമ്പര്യം എന്നിവയെല്ലാം സുരക്ഷിതമായിരിക്കുമെന്ന് കോൺഗ്രസ് നേതൃത്വവും ഉറപ്പ് നൽകി.
എന്നാൽ വിചിത്രമായ ഒരു യാദൃശ്ചികതയെന്നോണം രാജ്യം സ്വതന്ത്രമാവുകയും നമ്മുടെ പൂർവികരുടെ ആദർശങ്ങൾക്ക് വിരുദ്ധമായി വിഭജിക്കപ്പെടുകയും ചെയ്തു, അല്ലെങ്കിൽ വിഭജിക്കപ്പെട്ടു. അന്നത്തെ നമ്മുടെ പൂർവികർ ദീർഘവീക്ഷണത്തോടെ പ്രവർത്തിക്കാതിരിക്കുകയും അൽപമെങ്കിലും ദുർബലരാവുകയും ചെയ്തിരുന്നെങ്കിൽ, ഇന്ന് ഈ രാജ്യം ഒരു ജനാധിപത്യ രാജ്യമാകാതെ ഒരു ഹിന്ദു രാഷ്ട്രമാകുമായിരുന്നു. അപ്പോൾ മുസ്ലിംകൾ ഉൾപ്പെടെയുള്ള രാജ്യത്തെ ന്യൂനപക്ഷങ്ങൾക്ക് അവരുടെ മതപരമായ അവകാശങ്ങൾ നഷ്ടപ്പെടുമായിരുന്നു.
എന്നാൽ ഖേദകരമെന്നു പറയട്ടെ, നിലവിലെ സർക്കാർ വഖഫ് ഭേദഗതി ബിൽ കൊണ്ടുവന്ന്, സ്വാതന്ത്ര്യസമയത്ത് ഇന്ത്യയുടെ മതേതര ഭരണഘടന വാഗ്ദാനം ചെയ്ത പള്ളികൾ, ദർഗകൾ, ഖബറിസ്ഥാനുകൾ, ഇമാംബാറകൾ, വഖഫ് സ്വത്തുക്കൾ എന്നിവ തട്ടിയെടുക്കാൻ ആഗ്രഹിക്കുന്നു. ഇന്ന് നമ്മുടെ രാജ്യസ്നേഹത്തെ ചോദ്യം ചെയ്യുന്നവർ പറയട്ടെ, അവരുടെ ആളുകൾ രാജ്യത്തിൻ്റെ സ്വാതന്ത്ര്യത്തിന് വേണ്ടി എന്ത് ചെയ്തു? അവർ എന്ത് ത്യാഗമാണ് ചെയ്തത്? മുമ്പ് ഞങ്ങൾ രാജ്യത്തിൻ്റെ സ്വാതന്ത്ര്യത്തിന് വേണ്ടി ത്യാഗങ്ങൾ സഹിച്ചു, എന്നാൽ ഇപ്പോൾ ആ സ്വാതന്ത്ര്യത്തെ സംരക്ഷിക്കാനും ഞങ്ങൾ ത്യാഗം സഹിക്കേണ്ടി വരുമെന്ന് തോന്നുന്നു. നമ്മൾ അങ്ങനെ ചെയ്തില്ലെങ്കിൽ, വായ തുറക്കുന്നത് പോലും വലിയ കുറ്റമായി കണക്കാക്കപ്പെടുന്ന ദിവസങ്ങൾ അകലെയല്ല.
രാജ്യത്തിൻ്റെ ഐക്യവും അഖണ്ഡതയും നിലനിർത്താൻ ജംഇയ്യത്ത് ഉലമാ ഏ ഹിന്ദ് എപ്പോഴും ക്രിയാത്മകമായ ശ്രമങ്ങൾ നടത്തിയിട്ടുണ്ടെന്നും രാജ്യവിഭജനത്തെ എതിർത്തിട്ടുണ്ടെന്നും അതിൻ്റെ ഭൂതകാലവും വർത്തമാനവും സാക്ഷ്യം വഹിക്കുന്നു. ഞങ്ങളുടെ കഴുത്തിൽ ചെരിപ്പുമാല അണിയിച്ചു, ഞങ്ങൾക്ക് നേരെ 'കുഫർ' ഫത്വകൾ പുറപ്പെടുവിച്ചു, എന്നാൽ ജംഇയ്യത്ത് ഉലമാ ഏ ഹിന്ദ് തങ്ങളുടെ നിലപാടിൽ നിന്ന് ഒരടിപോലും പിന്നോട്ട് പോയില്ല. രാജ്യത്തിൻ്റെ ഭരണഘടനയോട് ഞങ്ങൾക്ക് സ്നേഹമുണ്ട്, കാരണം അത് രാജ്യത്തിൻ്റെ ഐക്യവും അഖണ്ഡതയും സംരക്ഷിക്കുന്ന രേഖയാണ്. അതിൻ്റെ വെളിച്ചത്തിൽ രാജ്യത്തിൻ്റെ ഭാവിയെ രൂപപ്പെടുത്താനും അതിനെ സമ്പന്നവും ലോകത്തിന് മാതൃകയുമായ ഒരു രാജ്യമാക്കാനും നമുക്ക് കഴിയും.
ഞങ്ങളുടെ കാഴ്ചപ്പാടിൽ, ജനാധിപത്യത്തിൻ്റെ അടിത്തറയാണ് ഭരണഘടന. അതിനെ അതിൻ്റെ സ്ഥാനത്ത് നിന്ന് ഇളക്കിയാൽ ജനാധിപത്യമെന്ന ഈ വലിയ കെട്ടിടത്തിന് നിലനിൽക്കാനാവില്ല. അതുകൊണ്ടാണ് "ഭരണഘടന രക്ഷപ്പെട്ടാൽ രാജ്യം രക്ഷപ്പെടും" എന്ന് ഞങ്ങൾ പലപ്പോഴും പറയുന്നത്. കഴിഞ്ഞ കുറച്ചു വർഷങ്ങളായി രാജ്യത്ത് നടക്കുന്ന ഏകപക്ഷീയമായ രാഷ്ട്രീയം ഭരണഘടനയുടെ നിലനിൽപ്പിന് തന്നെ ചോദ്യചിഹ്നമായിരിക്കുകയാണ്. ഇത്തരം സാഹചര്യത്തിൽ, രാജ്യത്തിൻ്റെ ഭരണഘടനയിലും ജനാധിപത്യത്തിലും വിശ്വസിക്കുന്ന എല്ലാ പൗരന്മാരുടെയും അടിസ്ഥാന ഉത്തരവാദിത്തമാണ് ഭരണഘടനയെ സംരക്ഷിക്കാൻ മുന്നോട്ട് വരിക എന്നത്. കാരണം ഭരണഘടനയുടെ മേധാവിത്വം അവസാനിച്ചാൽ പിന്നെ ജനാധിപത്യവും ജീവിച്ചിരിക്കില്ല.
ഇന്ന് ലോകമെമ്പാടും കൊട്ടിഘോഷിക്കപ്പെടുന്ന സ്വാതന്ത്ര്യവും ജനാധിപത്യവും നമ്മുടെ പൂർവികരുടെ നീണ്ട പോരാട്ടത്തിൻ്റെയും ത്യാഗത്തിൻ്റെയും ഫലമാണ്. രാജ്യത്ത് ജനാധിപത്യത്തിൻ്റെ ഔന്നത്യവും ഭരണഘടനയുടെ സംരക്ഷണവും ഉറപ്പാക്കുന്നതോടൊപ്പം, നൂറ്റാണ്ടുകൾ പഴക്കമുള്ള സമാധാനത്തിൻ്റെയും പരസ്പര സാഹോദര്യത്തിൻ്റെയും പാരമ്പര്യത്തിന് പുതുജീവൻ നൽകുക എന്നതാണ് ജംഇയ്യത്ത് ഉലമായെ ഹിന്ദിൻ്റെ അടിസ്ഥാന ലക്ഷ്യം.
ഏതൊരു പരിഷ്കൃത സമൂഹത്തിനും നീതിയും സമാധാനവുമാണ് ഏറ്റവും വലിയ അളവുകോൽ. ഓരോ ഭരണാധികാരിയുടെയും അടിസ്ഥാന കടമ തൻ്റെ പ്രജകൾക്ക് അതായത് ജനങ്ങൾക്ക് നീതി ലഭ്യമാക്കുക എന്നതാണ്. എന്നാൽ ഖേദകരമെന്നു പറയട്ടെ, വർഗീയവാദികളുടെ സങ്കുചിത മനോഭാവം ഒരു പ്രത്യേക വിഭാഗത്തെ ഒറ്റപ്പെടുത്താൻ ബോധപൂർവമായ ഗൂഢാലോചന നടത്തുന്നു. യുവാക്കളെ ക്രിയാത്മക പ്രവർത്തനങ്ങളിൽ ഏർപ്പെടുത്തുന്നതിന് പകരം വിദ്വേഷത്തിൻ്റെ ഉപകരണങ്ങളാക്കി മാറ്റുന്നു. പക്ഷപാതപരമായ മാധ്യമങ്ങൾ നുണകളും പ്രകോപനങ്ങളും പ്രചരിപ്പിക്കുന്നതിനുള്ള ഏറ്റവും വലിയ ഉപാധിയായി മാറിയിരിക്കുന്നു.
ഒരു വശത്ത് ഭരണഘടനയുടെ പേരിൽ സത്യപ്രതിജ്ഞ ചെയ്യുകയും മറുവശത്ത് ഭരണഘടനയുടെ മാർഗ്ഗനിർദ്ദേശക തത്വങ്ങളെ കാറ്റിൽ പറത്തുകയും ചെയ്യുന്നത് എത്ര വിരോധാഭാസമാണ്. രാജ്യത്തെ ന്യൂനപക്ഷങ്ങളെ തൃപ്തിപ്പെടുത്തുക എന്നത് ഏതൊരു ഭരണാധികാരിയുടെയും ഉത്തരവാദിത്തമാണ്. ന്യൂനപക്ഷങ്ങൾക്ക് പ്രത്യേക അവകാശങ്ങൾ മാത്രമല്ല, പൂർണ്ണ മതസ്വാതന്ത്ര്യവും ഉറപ്പുനൽകുന്ന ആ മതേതര ഭരണഘടന ഇപ്പോഴും നിലനിൽക്കുമ്പോഴാണ് ഇതെല്ലാം സംഭവിക്കുന്നത്. ഈ മതേതര ഭരണഘടനയ്ക്ക് വേണ്ടിയാണ് നമ്മുടെ പൂർവികർ 150 വർഷത്തോളം രാജ്യത്തെ അടിമത്തത്തിൽ നിന്ന് മോചിപ്പിക്കാൻ ത്യാഗങ്ങൾ സഹിച്ചത്.
ഖേദകരമായ കാര്യമെന്തെന്നാൽ, മതേതരവാദികളെന്ന് അവകാശപ്പെടുന്ന ചില രാഷ്ട്രീയ പാർട്ടികൾ അധികാരം നേടുന്നതിന് വേണ്ടി വർഗീയ ശക്തികളെ സഹായിക്കുകയും പിന്തുണയ്ക്കുകയും ചെയ്യുന്നു. ഇത് സുസ്ഥിരമായ ഒരു ജനാധിപത്യത്തിന് നല്ല ലക്ഷണമല്ല. അതിനാൽ, വർഗീയതയ്ക്കെതിരെ സമാധാനവും ഐക്യവും സാഹോദര്യവും വളർത്താനും വെറുപ്പിന്റെ രാഷ്ട്രീയത്തിനെതിരെ പരസ്യമായി മുന്നോട്ട് വരാനും ഓരോ പൗരനും (ഹിന്ദുവും മുസ്ലിമും അടക്കം) ബാധ്യതയുണ്ട്. കാരണം നിലവിലെ സാഹചര്യം അത്രമാത്രം സ്ഫോടനാത്മകമാണ്. ഇനിയും മൗനം പാലിച്ചാൽ വെറുപ്പിന്റെ ഈ രാഷ്ട്രീയം രാജ്യത്തിൻ്റെ സമാധാനത്തിനും ഐക്യത്തിനും ഗുരുതരമായ ഭീഷണിയായി മാറിയേക്കാം.
ഗ്രന്ഥ പരിചയം
📓 ദുആകളുടെ രചനകൾ
* സ്വീകാര്യമായ പ്രാർത്ഥനകൾ - ₹110/-
* മഖ്ബൂലായ ദുആകൾ - ₹80/-
* ഇലാഹീ ധ്യാനത്തിൻ്റെ വിശുദ്ധ വചനങ്ങൾ - ₹80/-
* ദുആകളുടെ അമാനുഷിക ഫലങ്ങൾ - ₹75/-
🎁 നിങ്ങൾ സ്വയം വായിക്കുകയും മുസ്ലിം അമുസ്ലിം സഹോദരങ്ങൾക്ക് ഉപഹാരമായി നൽകുകയും ചെയ്യുക.
📦 ഈ മഹത് ഗ്രന്ഥം നിങ്ങളുടെ വീട്ടിലെത്താൻ ഉടൻ തന്നെ വാട്സപ്പ് മെസേജ് അയക്കൂ... 👇
🔹🔹🔹🔹🔹
